Lývrdyń dırektory qatesin moıyndap, otstavkaǵa ketýge ótinish berdi

ASTANA.KAZINFORM — Lývr murajaıynyń dırektory Lorans de Kar sársenbi kúni murajaıdyń baqylaý júıesindegi kemshilikterdi moıyndap, qaýipsizdiktiń jańa sharalaryn jarııalady, dep habarlaıdy Sınhýa. 

Frantsýz senaty aldynda sóz sóılegen Lorans de Kar murajaıdaǵy beınebaqylaý kameralary jetkiliksiz ekenin jáne jeksenbi kúngi urlanǵan zergerlik buıymdar murajaı qyzmetiniń «álsiz jaqtaryn» áshkerelegenin aıtty.

— Biz Lývr qyzmetindegi eń qıyn sátsizdigine tap bolyp jatyrmyz, men bul qateliktegi óz úlesimdi moıyndaımyn, — dedi ol otstavkaǵa ketý týraly ótinish bergenin, biraq Mádenıet mınıstri ony qabyldamaǵanyn aıtyp.

Dırektor qaýipsizdikti kúsheıtý sharalaryn jarııalady, onyń ishinde kólikke qarsy tosqaýyldarmen perımetrlik qorǵanysty kúsheıtý, búkil murajaı keshenindegi baqylaý júıesin keńeıtý jáne jańǵyrtý bar. Sondaı-aq, Іshki ister mınıstrliginen murajaı ishinde polıtsııa bólimshesin qurýdy surady.

Ol murajaıdyń quny 80 mıllıon eýro turatyn qaýipsizdik josparyn qorǵap, ony júzege asyrýdaǵy «turaqty kidirister» týraly jaqynda jasalǵan baıandamany joqqa shyǵardy.

Frantsııa prezıdenti Emmanıýel Makron sársenbi kúngi úkimet otyrysynda Lývrdaǵy qaýipsizdikti jedeldetýge shaqyrdy.

Ótken aptada tórt belgisiz adam ataqty murajaıdyń Apollon galereıasyndaǵy eki vıtrınadan tergeýshiler quny 88 mıllıon eýroǵa baǵalaǵan segiz baǵa jetpes áshekeı buıymdardy urlap ketken.

Keıinirek belgili bolǵandaı, Frantsııanyń aýdıtorlyq soty Lývrdaǵy qaýipsizdik sharalarynyń álsizdigi týraly eskertken.

Makronnyń Lývrdan urlanǵan koroldik qazynalardy qaıtarýǵa ýáde etkenin de habarlaǵan edik.