Lývrdaǵy urlyqty jaǵdaıy tómen aýdandardan shyqqan usaq qylmyskerler jasaǵan

ASTANA. KAZINFORM — Lývrǵa jasalǵan urlyq áreketin kásibı qaraqshylar emes, Parıjdiń áleýmettik jaǵdaıy tómen aýdandarynan shyqqan usaq qylmyskerler jasaǵan. Bul týraly qala prokýrory Lor Bekko málimdedi, dep habarlaıdy The Guardian.

Parıj prokýrorynyń aıtýynsha, ustalǵandar buryn tek usaq urlyq jasaǵany úshin sottalǵan. Olardyń áreketteri uıymdasqan qylmys ádisterine sáıkes kelmeıdi, buǵan tonaý barysynda jiberilgen kóptegen qatelikter dálel.

— Bul múldem daǵdylanbaǵan qylmystyq áreket, biraq ony ádette uıymdasqan qylmystyń joǵary eshelondarymen baılanystyrmaımyz, — dedi Bekko.

Qaraqshylardyń kásibı emes ekenin olardyń qashyp bara jatqanda eń qundy qazyna — altyn men qymbat tastardan jasalǵan Evgenııa patshaıymnyń tájin túsirip alyp, ony sol kúıi qaldyryp ketkeni dáleldeıdi.

Sondaı-aq qylmyskerler oqıǵa ornynda DNQ izderi qalýy múmkin qural-saımandardy da tastap ketken.

Eske sala ketsek, Lývrdaǵy urlyqqa qatysy bar degen kúdikpen bes adam tutqyndalǵan, alaıda zergerlik buıymdar áli tabylǵan joq.

Buǵan deıin Parıjde Lývr murajaıynda baǵaly buıymdar urlanǵany habarlanǵan edi.

Frantsııa prezıdenti Emmanıýel Makron Lývrdaǵy zergerlik buıymdardyń urlanǵanyna jaýap berip, olardyń qaıtarylyp, kináliler jaýapqa tartylatynyn aıtty.

Al osydan buryn Dýrov Lývrdan urlanǵan zergerlik buıymdardy satyp alýǵa daıyn ekenin atap ótti.

Atyshýly isti tergeý qalaı júrip jatqanyn myna materıaldan oqı alasyz.