Lývrdaǵy urlyqtan keıin qaýipsizdik júıesi kúsheıtiledi
ASTANA. KAZINFORM — 19 qazanda bolǵan urlyq kezinde qaskóılerge júk lıfti arqyly terezeni buzyp, quny 88 mıllıon eýro bolatyn zergerlik buıymdardy urlaý úshin segiz mınýttan az ýaqyt qajet boldy, dep habarlaıdy Kazinform menshikti tilshisi.
Lývr mýzeıiniń basshysy Lorans de Kar sársenbi kúni Parıjdegi áıgili nysanda koroldik baǵaly buıymdar urlanǵannan keıin jaqyn ýaqytta jańa beınebaqylaý kameralary men ruqsatsyz kirýden qorǵaý júıeleri ornatylatynyn málimdedi.
Mýzeı dırektorynyń aıtýynsha, kelesi jyldyń sońyna deıin shamamen 100 jańa kamera ornatylyp, paıdalanýǵa beriledi, al eki apta ishinde ruqsatsyz kirýden qorǵaý júıelerin ornatý bastalady.
Ol bul júıelerdi mýzeı ǵımarattaryna bógde adamdardyń jaqyndaýyna jol bermeıtin jabdyq retinde sıpattady, alaıda naqty málimetter keltirmedi.
— Shoktan, emotsııalardan jáne baǵalaýdan keıin áreket etetin ýaqyt keldi, — dedi L. de Kar Ulttyq jınalystyń Mádenıet isteri komıtetinde sóılegen sózinde.
Mýzeı basshysy bul sharalar qaýipsizdik jónindegi «úılestirýshi» laýazymyn engizýdi qosa alǵanda, júzege asyrylatyn 20-dan astam shuǵyl sharanyń bir bóligi ekenin atap ótti.
19 qazandaǵy urlyq kúni qaskóıler jebeli kólik arqyly «Apollo» galereıasynyń terezesinen kirip, zergerlik buıymdar men jalpy quny 88 mıllıon eýroǵa baǵalanatyn qazynalardy segiz mınýtqa jetpeıtin ýaqytta urlap ketken.
Bir aptadan keıin birneshe kúdikti ustaldy. Tonaýdan keıin mýzeı zaldarynyń shamamen úshten birinde beınebaqylaý kameralary bolmaǵany, al qoldanystaǵy dabyl júıesiniń iske qosylmaǵany belgili boldy.
De Kars qaýipsizdikti jaqsartý bıyl iske qosylǵan, quny 800 mıllıon eýroǵa deıin baǵalanatyn «Lývrdyń jańa qaıta órleýi» atty on jyldyq jospardyń basty basymdyǵy ekenin aıtty. Bul jospar ınfraqurylymdy jańǵyrtýǵa, kelýshilerdiń shamadan tys kóp bolýyn azaıtýǵa jáne 2031 jylǵa qaraı «Mona Lıza» úshin jeke zal salýǵa baǵyttalǵan.
Eske salsaq, budan buryn Lývr murajaıy jabylǵannan keıin qyzmetkerler ereýilge shyqqany belgili boldy.
Sonymen qatar QR Іshki ister mınıstriniń orynbasary Sanjar Ádilov qazaqstandyq mýzeılerdegi qaýipsizdik sharalary týraly aıtyp berdi.