Lývrdaǵy urlyq týraly fılm túsiriledi
ASTANA. KAZINFORM — Amerıkalyq rejısser Lývrda bolǵan eń tanymal urlyq oqıǵasy týraly trıllerge uqsas derekti fılm túsirýdi josparlap otyr, dep habarlaıdy BILD.
The Hollywood Reporter gazetiniń málimetinshe, bul derekti fılm urlyqqa qatysty tergeýdi jáne qylmyskerlerdi izdestirý barysyn naqty ýaqyt rejıminde kórsetedi dep kútiledi. Sondaı-aq urlanǵan áshekeılerdiń qaıda ketýi múmkin ekendigi — qara naryqtan bastap Antverpendegi gaýhar saýdasyna deıin — zertteletin bolady.
Jobaǵa amerıkalyq rejısser Ar Djeı Katler men frantsýz derekti fılm jasaýshysy Loran Býzero jetekshilik etedi. Olar qazirdiń ózinde trý-kraım janry men trıllerdiń qospasy bolatyn fılmdi túsirip jatyr. Fılm polıtsııa tergeýshileriniń jumysyn kórsetýdi maqsat etedi. Avtorlardyń aıtýynsha, fılmge oqıǵa kýágerleri, mýzeı qyzmetkerleri men qala turǵyndary da qatysady.
Eske sala ketsek, Lývrǵa 19 qazan kúni tańerteń urylar tústi. Qylmyskerler jeti mınýt ishinde quny 88 mıllıon eýro bolatyn áshekeıler men qymbat buıymdardy urlap ketken. Bir aptadan keıin birneshe kúdikti qolǵa tústi. Urlyqtan keıin mýzeı zaldarynyń shamamen úshten birinde beınebaqylaý kameralary joq ekeni, al bar dabyl júıesi iske qosylmaǵany belgili boldy.
Urlyqtan bir aı ótken soń eki belgııalyq taǵy da Lývrdyń qaýipsizdik qyzmetin aldap ótýdi sátti iske asyrdy.
Parıj prokýrory Lor Bekkonyń aıtýynsha, Lývrǵa jasalǵan shabýyldy kásibı urylary emes, qalanyń qolaısyz aýdandarynan shyqqan usaq qylmyskerler jasaǵan.
Buǵan deıin Lývr 2026 jyldyń sońyna deıin 100 beınekamera ornatatyny habarlanǵan edi.