Lývrdaǵy atyshýly urlyq: Mýzeı basshysy qyzmetinen ketýge ruqsat aldy

ASTANA. KAZINFORM — Frantsııa prezıdenti Emmanýel Makron Lývr murajaıynyń dırektory Lorans de Kardyń otstavkasyn qabyldady. Bul týraly Elıseı saraıy habarlady, dep jazdy VVS. 

Mýzeı dırektory byltyr qazan aıyndaǵy atyshýly tonaýdan keıin otstavkaǵa ketýge árekettengen bolatyn.

Jalpy Lývrdyń basshysyn eldiń mádenıet mınıstriniń usynysy boıynsha Frantsııa prezıdenti taǵaıyndaıdy. Sondaı-aq onyń otstavkaǵa ketý týraly ótinishin qabyldaý nemese qabyldamaý týraly sheshimdi de el prezıdenti shyǵarady.

Lorans de Kar óziniń otstavkaǵa ketý týraly alǵashqy ótinishin ótken jyldyń 21 qazanynda, qaraqshylar murajaıdan 90 mıllıon eýro turatyn zergerlik buıymdardy urlap ketkennen keıin eki kún ótken soń tapsyrdy. Alaıda, murajaıdy qalpyna keltirýge daıyndyq kezinde ótinish qabyldanbady.

Frantsııa prezıdenti mýzeı dırektoryna joldaǵan hatynda ony tabandy bolýǵa jáne «murajaıdy qalpyna keltirýdiń josparlanǵan qarqynyn buzýy múmkin» qadamdardan aýlaq bolýǵa shaqyrdy.

Frantsýz baspasózi Lorans de Kar prezıdenttiń qoldaýyna ıe bolǵanyn atap ótti. Ázirge onyń ekinshi ret otstavkaǵa ótinish qaldyrýyna ne túrtki bolǵany belgisiz.

Lývrdaǵy atyshýly tonaý mýzeıdegi basqa da máselelerge nazar aýdartty. Ǵımarattyń qazirgi kúıi, keıbir bólmelerdi sý basý, qyzmetkerlerdiń ereýilge shyǵýy jáne bılet satýdaǵy alaıaqtyq is álemge tanymal murajaıdyń bedeline nuqsan keltirdi.

Aıta keteıik, Lývr mýzeıiniń birneshe zalynda sý aǵyp ketýine baılanysty ýaqytsha jabyldy.