Lývrdaǵy alaıaqtyq: mýzeı qyzmetkerleri men gıdter 10 mln eýroǵa jýyq shyǵynǵa batty
PARIJ. KAZINFORM – Frantsýz polıtsııasy álemdegi eń tanymal mýzeılerdiń biri – Lývr aýmaǵynda kópjyldyq bılet alaıaqtyǵyna qatysty aýqymdy operatsııa júrgizip, 9 adamdy ustady. Bul týraly Kazinform agenttiginiń menshikti tilshisi habarlaıdy.
Parıj prokýratýrasynyń málimetinshe, keltirilgen shyǵyn 10 mln eýrodan asady. Tergeý derekterine sáıkes, zańsyz áreketter Lývrmen qatar ishinara Versal saraıy aýmaǵynda da júzege asqan.
Operatsııa 2026 jylǵy 10 aqpanda ótti. Ustalǵandardyń qatarynda Lývrdiń eki qyzmetkeri – kireberistegi baqylaýshylar, birneshe týrıstik gıd jáne tergeý negizgi uıymdastyrýshy dep esepteıtin bir tulǵa bar.
Tergeý málimetinshe, alaıaqtyq shema keminde 2024 jyldyń jazynan beri jumys istegen, al keı boljam boıynsha 10 jylǵa deıin sozylýy múmkin. Negizgi tásilder mynalar bolǵan:
– resmı lımıti 20 adamnan aspaıtyn ekskýrsııalyq toptardy ádeıi kóbeıtý;
– bir bıletti kúni boıy birneshe ret skanerlep, ártúrli týrısterge paıdalaný;
– resmı kassadan tys «ekskýrsııalar» uıymdastyryp, bıletterdi qymbat baǵamen satý.
Týrısterdiń basym bóligi Qytaı azamattary bolǵany aıtylady. Qarajat uıymdastyrýshylarǵa tikeleı túsken. Mýzeı qyzmetkerleri bılet teksermeý nemese toptardy tólemsiz ótkizý úshin qolma-qol para alǵan. Sonymen qatar jalǵan jáne qaıtalanǵan bıletter qoldanylǵan.
2024 jyly Lývr ákimshiligi gıdterdiń kúmándi áreketterin jáne bıletten túsetin tabystaǵy sáıkessizdikterdi baıqap, quqyq qorǵaý organdaryna shaǵym túsirgen. 2025 jyldyń maýsymynda uıymdasqan alaıaqtyq, aqshany jylystatý, sybaılas jemqorlyq jáne qylmysqa járdemdesý baptary boıynsha resmı tergeý bastalǵan.
Tintý barysynda kúdiktilerden 957 myń eýrodan astam qolma-qol aqsha, banktik shottarda shamamen 486 myń eýro jáne bank seıfterindegi qarajatty qosa alǵanda jalpy 1,4 mln eýrodan astam qarajat tárkilengen. Birneshe avtokólik te aıǵaq retinde alynǵan.
Bul sońǵy aılardaǵy ekinshi iri oqıǵa. 2025 jyldyń qazan aıynda mýzeı aýmaǵynda shamamen 88 mln eýro turatyn zergerlik buıymdar urlanǵan bolatyn.
Lývr basshylyǵy tergeýmen tolyq yntymaqtasyp jatqanyn málimdep, mundaı jaǵdaılar mekemege degen senimge nuqsan keltiretinin atap ótti. Qazirgi ýaqytta mýzeı qalypty rejımde jumys istep jatyr, alaıda kireberisterdegi baqylaý kúsheıtilgen.