Lývrda tarıhı jádigerler urlanǵan zal qaıta ashylady
ASTANA. KAZINFORM — Parıjdegi Lývr mýzeıi 2025 jylǵy atyshýly tonaýdan keıin alǵash ret kelýshiler úshin Apollon galereıasyn ashady, dep habarlaıdy Anadoly.
2025 jyldyń qazan aıynda belgisiz adamdar shyny vıtrınalardy syndyryp, baǵaly áshekeılerdi urlap ketken galereıa 22 shildeden bastap qaıtadan kelýshilerdi qabyldaıdy.
Alaıda galereıadaǵy vıtrınalar alynyp tastalady, al buǵan deıin qoıylǵan zergerlik buıymdar qaıta qoıylmaıdy.
Lývr dırektory Krıstof Lerıbo Le Parisien gazetine bergen suhbatynda tonaýdan keıin Apollon galereıasynda saqtalǵan barlyq qundy kollektsııalar men jádigerlerdiń mýzeıden áketilgenin aıtty.
Eske salsaq, 19 qazanda Parıj prokýrory Lor Beko 4 qaraqshynyń Lývrǵa avtogıdrokótergishtiń kómegimen kirip, Apollon galereıasyndaǵy vıtrınalardy buzyp, 9 áshekeıdi urlaǵanyn málimdegen bolatyn. Olardyń qatarynda III Napoleonnyń jubaıy ımperatrıtsa Evgenııanyń 1 354 gaýhartaspen kómkerilgen táji de bolǵan. Qaraqshylar qashý kezinde tájdi túsirip alǵan.
Tergeý málimetinshe, qylmysty kásibı top jasaǵan. Urlanǵan asyl buıymdardyń jalpy quny shamamen 88 mıllıon eýroǵa baǵalandy.
Tórt qaskóı 8 tarıhı áshekeıdi qoldy etken, al tonaý nebári 7 mınýtqa sozylǵan.
Aıta keteıik, buǵan deıin Frantsııada bul atyshýly urlyq oqıǵasy jelisimen derekti serıal men kórkem fılm túsiriletini týraly jazdyq.
