Lývrda qazaq óneriniń kórmesin ótkizýge kelissóz júrip jatyr
ASTANA. KAZINFORM – Parıjdegi áıgili Lývr mýzeıinde qazaq óneriniń kórmesin ótkizý maqsatynda kelissózder júrip jatyr. Bul týraly Mádenıet jáne aqparat mınıstrligi Mádenıet komıtetiniń tóraǵasy Kúmis Seıitova málim etti.
«Jaqyn arada Mádenıet jáne aqparat mınıstri bastaǵan top ókil Frantsııaǵa baryp Lývr murajaıynda kórme uıymdastyrý jaǵyn talqylady. Bıyl Frantsııa astanasy Parıjdegi Gıme shyǵys óneri mýzeıinde Ulttyq mýzeıdiń kórmesi ótedi. Al Lývr boıynsha kelissózder júrip jatyr», - dedi Kúmis Seıitova 60-shy Venetsııa óner bıennalesinde Qazaqstannyń kórmesin uıymdastyrýǵa oraı ótken baspasóz máslıhatynda.
Eske sala ketsek, ótken jyly aqpanda sol kezdegi Mádenıet jáne sport mınıstri Ashat Oralov Lývrda qazaq óneriniń kórmesi ótetini týraly málimdegen edi.
Byltyr kúzde mınıstrlikke qarasty Mádenıet komıtetinen Lývr mýzeıine qoıylatyn ulttyq pavılonnyń jobasy ázirlenip jatqany aıtyldy.
