Lývrda 2026 jyldyń sońyna deıin 100 beınekamera ornatylady

ASTANA. KAZINFORM – Frantsııanyń Ulttyq assambleıasynda sóz sóılegen Lývr mýzeıiniń dırektory Lorans de Kar 2026 jyldyń sońyna deıin mýzeı aýmaǵyna 100 beınebaqylaý kamerasy ornatylatynyn málimdedi, dep habarlaıdy VVS.

Frantsııanyń BFM telearnasynyń dereginshe, kamera ornatý — Lývr basshylyǵy tonaý oqıǵasynan keıin jarııalaǵan qaýipsizdikti kúsheıtýge baǵyttalǵan 20 is-sharadan turatyn baǵdarlamanyń bir bóligi.

Baǵdarlama aıasynda Lývr aýmaǵynda polıtsııa beketi ashylady, al mýzeı ishinde qaýipsizdik jónindegi úılestirýshi laýazymy engiziledi.

Eske salaıyq, Lývrdaǵy urlyq 19 qazan tańerteń bolǵan. Qylmyskerler jeti mınýt ishinde shamamen 88 mln eýroǵa baǵalanatyn zergerlik buıymdar men asyl tastardy urlap ketken. Bir aptadan keıin birneshe kúdikti ustaldy.

Oqıǵadan keıin mýzeıdiń shamamen úshten bir zalynda beınekamera ornatylmaǵany, al bar dabyl júıesiniń iske qosylmaǵany anyqtaldy.

Budan bólek, tonaýdan keıingi bir aı ótken soń eki belgııalyq bloger taǵy da Lývrdyń qaýipsizdik qyzmetin aldap ótip, qorǵaý júıesiniń álsizdigin kórsetti.