Lývr isi: Taǵy tórt adam ustaldy

ASTANA. KAZINFORM – Parıj prokýratýrasynyń habarlaýynsha, Lývr urlyǵyna qatysty 38 ben 39 jastaǵy eki er adam jáne 31 men 40 jastaǵy eki áıel suraq alý úshin ustaldy, dep habarlaıdy DW.

Frantsııa polıtsııasy Lývrdaǵy oqıǵadan bes apta ótken soń taǵy tórt kúdiktini ustady.

— Bul Parıj aımaǵynan shyqqan 38 jáne 39 jastaǵy eki er adam men 31 jáne 40 jastaǵy eki áıel, — dedi 25 qarasha kúni Parıjdiń bas prokýrory Lora Bekko.

AFP keltirgen Bekkonyń málimdemesinde 19 qazanda bolǵan Lývrdy tonaýǵa ustalǵandardyń qandaı qatysy bolýy múmkin ekeni kórsetilmegen. Frantsııa zańnamasyna sáıkes, tergeý maqsatynda bastapqy qamaýda ustaý 96 saǵatqa deıin sozylýy múmkin.

29 qazanda bastalǵan tergeý aıasynda buǵan deıin taǵy tórt adamǵa aıyp taǵylǵan. Olardyń arasynda mýzeıdi tonady dep kúdikke ilingen 35, 37 jáne 39 jastaǵy úsh er adam bar. Tórtinshi kúdikti  38 jastaǵy áıel qylmysqa qatysy bar dep kúdikke ilinip otyr.

Tergeý málimetinshe, qylmyskerler 19 qazanda kúndiz Lývrǵa júk kóligine ornatylǵan jyljymaly baspaldaqty paıdalanyp kirgen. Olar terezeni keskish quralmen buzyp, mýzeıge kirgen. Qylmys ornynan qashyp bara jatyp, baspaldaqtan túsken kezde gaýhar jáne zúbárjatpen kómkerilgen tájdi túsirip alǵan, alaıda segiz basqa eksponatty alyp ketken.

Jalpy barlyǵy 8 zat qoldy bolǵan. Olardyń arasynda Marııa-Lýıza kollektsııasyndaǵy alqa men syrǵa, Marııa-Amelııa jáne Gortenzııa toptamalarynan alynǵan alqa, syrǵa jáne táj bar. Sondaı-aq ımperatrıtsa Evgenııaǵa tıesili kollektsııadan eki brosh (onyń biri – relıkvarıı broshy), korsajǵa taǵatyn bantık jáne táj joǵalǵan.

Aıta ketelik murajaı shyǵyny 88 mıllıon eýroǵa baǵalandy. Sonymen qatar Lývrdaǵy urlyq týraly fılm túsiriledi. Lývrda 2026 jyldyń sońyna deıin 100 beınekamera ornatylady.