Lývr mýzeıiniń qyzmetkerleri ereýildi qaıta bastaıdy
ASTANA. KAZINFORM – Frantsııadaǵy áıgili Lývr mýzeıiniń qyzmetkerleri dúısenbi, 5 qańtar kúni jalpy jınalys ótkizip, jańa jylda ereýildi jalǵastyrý týraly sheshim qabyldady. Bul týraly Kazinform agenttiginiń menshikti tilshisi habarlady.
Kásipodaqtardyń pikirinshe, Frantsııanyń Mádenıet mınıstrligi usynǵan eńbek jaǵdaılaryn jaqsartý jónindegi sharalar jetkiliksiz.
2025 jylǵy 15 jeltoqsanda mýzeıde ótken jınalysqa qatysqan 400 qyzmetker bir kúndik ereýil ótkizý týraly biraýyzdan sheshim qabyldaǵan. Keıbiri merzimsiz ereýil jarııalaýdy da usynǵan.
Sonyń saldarynan 16 jeltoqsanda mýzeı kelýshiler úshin jabyq boldy. 17 jeltoqsanda Lývr qaıta ashylǵanymen, shekteýli rejımde jumys istedi. Al 19 jeltoqsanda mýzeı qyzmetkerleri ereýildi ýaqytsha toqtatqan edi.
Le Parisien gazetiniń málimetinshe, Lývr qyzmetkerleri mýzeıdi basqarý ádisterine narazylyq bildirip otyr. Ásirese sońǵy aılarda bolǵan birqatar jaǵymsyz oqıǵa, sonyń ishinde qazan aıynda Apollon galereıasynda bolǵan tonaý jaǵdaıy narazylyqty kúsheıtken.
Qyzmetkerler kadr tapshylyǵy, tehnıkalyq aqaýlar men ǵımarattyń jalpy jaǵdaıyna baılanysty mýzeı zaldarynyń belgilengen jumys ýaqytynan áldeqaıda kesh jabylatynyna narazy.
Sonymen qatar olar «jumys júktemesiniń artýyna, basqarýdyń barǵan saıyn qatań ádisterine jáne bir-birine qaıshy nusqaýlarǵa» tap bolyp otyrǵandaryn, bul kelýshilerge sapaly ári tynysh qyzmet kórsetýge kedergi keltiretinin aıtady.
Búgin CGT, CFDT jáne Sud atty úsh kásipodaqtyń shaqyrýymen ótken jınalysta qatysýshylar mýzeıdegi eńbek jaǵdaılaryna narazylyq retinde ereýildi qaıta bastaýǵa biraýyzdan daýys berdi. Qazirgi ýaqytta mýzeı «jartylaı ashyq» kúıde qalyp otyr.
— Menedjerlerdi, mádenı murany qorǵaý mamandaryn jáne qosalqy qyzmet ókilderin qosa alǵanda, túrli saladaǵy shamamen 350 adam ereýildi qaıta bastaýǵa biraýyzdan daýys berdi, — dedi CFDT uıymynyń ókili Valerı Bod.
Al CGT-Louvre Instagram jelisindegi paraqshasynda kúres 2026 jyly jalǵasatynyn jazdy.
— Jalpy jınalysta ereýildi jalǵastyrý týraly biraýyzdan sheshim qabyldandy. Kúres 2026 jyly da jalǵasady, — dep jazdy .
Buǵan deıin Parıjdegi mýzeı basshylyǵy qaýipsizdik sharalaryn kúsheıtýge ýáde bergen bolatyn.