Lývr mýzeıi stýdentter narazylyǵyna baılanysty ýaqytsha jabyldy
ASTANA. KAZINFORM — Dúısenbi kúni tańerteń óner jáne mádenıet oqý oryndarynyń stýdentteri mektepterdegi narazylyq sharalaryn qoldap, áıgili Lývr murajaıyna kirý jolyn jaýyp tastady, dep habarlaıdy Franceinfo.
Derekkózdiń habarlaýynsha, aktsııany negizinen Lývr joǵary mektebiniń (École du Louvre) stýdentteri uıymdastyrǵan. Oǵan Beıneleý óneri mektebin qosa alǵanda, basqa da oqý oryndarynyń stýdentteri qatysqan.
Narazylyqqa baılanysty Lývr mýzeıi tańǵy saǵat 9:00-de ashylmady. Qatysýshylar «Álemdegi eń úlken mýzeıdiń jumysyn toqtatqanymyzdy maqtan tutamyz» degen jazýy bar únparaq taratty.
Lývr basshylyǵy narazylyq aktsııasynyń mýzeıge tikeleı qatysy joq ekenin aıtyp, mekeme ózge máselelerge nazar aýdartý alańy retinde paıdalanylyp otyrǵanyn atap ótti. CGT kásipodaǵy mýzeı keminde túske deıin jabyq bolady dep boljady.
Frantsııada mektep oqýshylarynyń narazylyǵy qyrkúıek aıynyń ortasynda muǵalim tapshylyǵy, oqýshy sanynyń kóptigi jáne bilim berý mekemelerindegi jaǵdaıdyń nasharlaýyna baılanysty bastaldy. Keıin narazylyq aýqymy keńeıip, ómir súrý qunynyń ósýi men bılik saıasatyna qatysty talaptardy da qamtydy.
17 qazanda Frantsııanyń birqatar óńirinde jappaı narazylyq aktsııalary ótti. Іshki ister mınıstrliginiń dereginshe, sherýge shamamen 550 myń adam qatysqan, al uıymdastyrýshylar qatysýshylar sanyn 800 myńǵa deıin baǵalady. Birneshe qalada tártipsizdik bolyp, tonaý jáne ǵımarattardy órteý oqıǵalary tirkeldi.
Lývr mýzeıine kirýdi shekteý 2025 jylǵy 19 qazanda Apollon galereıasynan zergerlik buıymdar urlanǵan atyshýly oqıǵadan týra bir jyl ótken soń boldy.
Buǵan deıin Lývr mýzeıine zańsyz kirgen stýdenttiń ustalǵanyn habarlaǵan edik.
