Lývr murajaıy jabyldy: qyzmetkerler ereýilge shyqty
ASTANA. KAZINFORM — Kásipodaq uıymdary Mádenıet mınıstri Rashıde Datıge joldaǵan hatynda ǵımarattaǵy tehnıkalyq aqaýlar men qolaısyzdyqtardy atap ótip, «Lývrǵa barý azapqa aınaldy» dep jazdy. Bul týraly Anadoly agenttigi habarlady.
Lývr murajaıy 19 qazan kúni qundy tarıhı jádigerleri urlandy dep habar taratqan bolatyn. Búginnen bastap álemge áıgili mýzeıdiń esigine qara qulyp salyndy. Sebebi qyzmetkerleri ereýilge shyqty.
Murajaı basshylyǵy kelýshilerdiń kóp bolýyna baılanysty ashylýdyń keıinge shegerilgenin habarlady. Sondaı-aq mýzeı jumysy qaıta bastalǵanda aqparat taratylatynyn aıtty.
Nashar eńbek jaǵdaılary men qaýipsizdik máselesine baılanysty ereýilge shyqqan mýzeı qyzmetkerleri Lývr aldyna jınalyp, «Lývr murajaıy ereýilge shyqty» degen banner ilindi.
Jalpy eńbek federatsııasy (CGT), Frantsııanyń demokratııalyq eńbek federatsııasy (CFDT) jáne SUD kásipodaq uıymy 8 jeltoqsanda murajaı qyzmetkerleriniń ereýilge shyǵatynyn habarlady.
Kásipodaq uıymdary Mádenıet mınıstri Rashıde Datıge joldaǵan hatynda ǵımarattaǵy tehnıkalyq aqaýlar men qolaısyzdyqtardy atap ótip, «Lývrǵa barý azapqa aınaldy» dep ereýil jarııalady.
Hatta murajaı qyzmetkerlerdiń jetispeýshiligine, tehnıkalyq aqaýlarǵa jáne nysannyń nashar jaǵdaıyna baılanysty ádettegideı jumys isteı almaıtynyn atap ótildi.
26 qarashada Lývrda shúmek ashylyp ketip, kóne Mysyr jádigerleri saqtalǵan bólmelerdiń biriniń tóbesinen sý aǵyp, júzdegen qujatqa zaqym kelgen. Qyzmetkerler «buǵan deıin mýzeı ǵımaratynyń nashar kútimi, eskirgen tehnıkalyq jabdyqtary men qaýipsizdik kemshilikteri eskerilse, mundaı oqys oqıǵa aldyn ala boljanǵan bolar edi» dedi. Olar basshylyqty jetkilikti shara qoldanbady dep aıyptady.
Aıta keteıik, buǵan deıin kásipodaq uıymdary Lývr qyzmetkerlerin 15 jeltoqsannan bastap ereýilge shyǵýǵa shaqyrǵany týraly jarııaladyq. Narazylyq sharasy qansha ýaqytqa sozylatyny belgisiz.