Lývr kitaphanasy las sýǵa tolyp, júzdegen qujat búlindi

ASTANA. KAZINFORM — Parıjdegi Lývr kitaphanasy las sýǵa tolyp, 400-ge jýyq qujat búlindi. Bul týraly murajaı ákimshisiniń orynbasary Frensıs Steınbok málimdedi, dep habarlaıdy BELTA. 

— Qubyrdan ketken káriz sýynyń kesirinen Mysyr kóne jádigerler kitaphanasynyń bir zalyna zaqym keldi. Qazirgi ýaqytta 300-400 qujattyń búlingeni belgili, biz tolyq túgendeý jumystaryn júrgizip jatyrmyz. Zaqymdanǵan shyǵarmalar sýdan shyǵarylyp, qazir lastanǵan shyǵarmalardyń ár betin keptirý jumystary júrgizilip jatyr, — dedi Frensıs Steınbok.

Onyń aıtýynsha, tek egıpettanýshylar, Lývr qyzmetkerleri men stýdentter paıdalanatyn merzimdi basylymdar, anyqtamalyqtar men arheologııalyq jýrnaldar búlingen. Olardyń eń kónesi HІH ǵasyrdyń aıaǵyna tıesili bolsa, basqalary HH ǵasyrdyń basynda jaryq kórgen.

Steınbok ǵımarattaǵy jeldetý jáne jylytý júıesindegi másele burynnan bar ekenin moıyndady. Ol murajaıdyń zardap shekken aımaǵy jańartylatyn aımaqtar tiziminde ekenin atap ótti.

Eske salaıyq, Lývrda 2026 jyldyń sońyna deıin 100 beınekamera ornatylady. Lývr basshylyǵy kamera ornatý isin tonaý oqıǵasynan keıin jarııalaǵan qaýipsizdikti kúsheıtýge baǵyttalǵan 20 is-sharadan turatyn baǵdarlamanyń bir bóligi ekenin atap ótti.