Lývr qyzmetkerleri ereýilge shyǵady

ASTANA. KAZINFORM — Kásipodaq uıymdary Lývr qyzmetkerlerin 15 jeltoqsannan bastap ereýilge shyǵýǵa shaqyrdy. Narazylyq sharasy qansha ýaqytqa sozylatyny belgisiz, dep habarlaıdy DW.

Kásipodaq uıymdary murajaıda aıtarlyqtaı kadr tapshylyǵy seziletinin, tehnıkalyq aqaýlar jáne mýzeıdiń jaǵdaıy nasharlaǵanyn málimdedi. Olar qyzmetkerlerdiń jumys ýaqyty ulǵaıyp, qatań basqarýǵa ushyrap jáne qısynsyz tapsyrmalar berilip, óz mindetterin oryndaýdy qıyndatyp jatqanyn atap ótti.

Qyzmetkerlerdiń shydamy Lývr kitaphanasynyń egıpetologııa bólimin sý basqannan keıin taýsylǵan. Jaǵdaı osy tusta ýshyǵa túsken.

CFDT-CGT kásipodaq ókili Valerı Bo jumysshylar birneshe jyl boıy basshylyqtan gıdravlıkalyq júıeni jóndeýdi suraǵanyn, biraq olardyń ótinishi eskerilmeı qalǵanyn eske saldy.

Qańtar aıynyń basynda SUD-Culture kásipodaq uıymy jańa murajaı jobalaryn, sonyń ishinde qosymsha kireberis pen jańa zaldar salýdy toqtatýǵa shaqyrǵan. Uıym bul bastamalardy «absýrd» dep atap, qarajatty Lývrdyń bar ınfraqurylymyn qalpyna keltirý men jańǵyrtýǵa baǵyttaýdy usyndy.

Kásipodaqtar mýzeı basshylyǵy qyzmetkerlerdiń kúndelikti ushyrasatyn máselelerin sheshýge kiriskenshe ereýil jalǵasa beretinin atap ótti.

Aıta keteıik, Lývr kitaphanasy las sýǵa tolyp, ondaǵy 400-ge jýyq qujat búlindi.