Lýsıne Gevorgıan: Armenııa — Qazaqstan úshin jańa týrıstik baǵyt
ALMATY. KAZINFORM – Armenııa men Qazaqstan arasyndaǵy týrızm salasyndaǵy áriptestik jańa deńgeıge kóterilýi múmkin. Bul týraly Kazinform tilshisine Armenııanyń týrızm komıtetiniń tóraǵasy Lýsıne Gevorgıan aıtty.
Onyń aıtýynsha, Qazaqstan men Armenııa arasyndaǵy qarym-qatynas árdaıym jyly ári dostyq sıpatta bolǵan. Bul baılanystar týrızm salasynda da óz kórinisin taýyp otyr.
– Biz qazaqstandyq týrısterdiń Armenııaǵa tek iskerlik maqsatpen emes, demalý úshin de jıi kelgenin qalaımyz. 2019 jyly Qazaqstannan kelgen týrıst sany shamamen 40 myń adamǵa jetti. Bul joǵary kórsetkish. Kóbinese bul bıznes-týrızm bolatyn. Al ótken jyly bul kórsetkish 11 myńǵa deıin tómendedi. Biraq olardyń kóbi Armenııaǵa bizdiń tarıhymyzben, mádenıetimizben, tabıǵatymyzben tanysý úshin keldi. Qazir Armenııa Qazaqstan úshin jańadan ashylyp jatqan týrıstik baǵytqa aınalyp jatyr, — deıdi Lýsıne Gevorgıan.
Spıkerdiń sózinshe, Armenııa qazir etno jáne gastronomııalyq týrızm baǵytynda belsendi damyp keledi. Eldiń baı tarıhı-mádenı murasy, ulttyq taǵamdary men sharap óndirisi sheteldik týrısterdi ózine tartyp otyr. El aýmaǵynda 26 myńnan astam tarıhı eskertkish tirkelgen, olardyń ishinde hrıstıan dinine deıingi dáýirge tıesili hramdar men shirkeýler de bar. Kóptegen nysandar ıÝNESKO-nyń dúnıejúzilik muralar tizimine engen.
Sonymen qatar, ol Qazaqstannyń armıan týrısteri úshin de qyzyqty baǵyt ekenin atap ótti. Birlesken týrpaketter men arnaıy usynystar ázirleý arqyly týrızmdi ekijaqty damytýǵa bolatynyn aıtty.
— Biz Qazaqstanmen aradaǵy týrızm salasyndaǵy baılanysty odan ári nyǵaıtýǵa múddelimiz. Birlesken bastamalar men jańa baǵyttar arqyly elderimizdiń týrıstik múmkindikterin keńeıtýge bolady. Sonymen qatar, eki el arasyndaǵy týrızmdi damytýǵa resmı qoldaý kórsetý maqsatynda memleketaralyq yntymaqtastyqty qurý josparda, — dep atap ol.
Aıtýynsha, qazir Aqtaýdan Erevanǵa tikeleı reıs bar.
— Buryn Almaty men Erevan arasynda áýe qatynasy bolǵan jáne meniń oıymsha, bul baǵytty eń bolmaǵanda joǵary maýsymda – sáýirden qazanǵa deıin qaıta bastaǵan durys bolar edi. Bul týrısterge festıvalderge, kontsertterge jáne basqa da mańyzdy sharalarǵa kelýge múmkindik beredi. Týrıster úshin tikeleı reısterdiń mańyzy zor, olar ádette transfersiz saıahattaýdy jón kóredi. Jaqyn arada qazaqstandyq áýe kompanııasymen Erevanǵa jańa reıster ashý múmkindigin talqylaýdy josparlap otyrmyz,— deıdi ol.
Eske salaıyq, buǵan deıin Armenııadaǵy Qazaqstan mádenı kúnderine úsh myńnan astam adam qatysqan bolatyn.