Lýla da Sılvanyń jeńisinen keıin Brazılııa qor naryǵy quldyrady
ASTANA. KAZINFORM — Brazılııa prezıdenti Lýıs Inasıý Lýla da Sılvanyń qaıta saılanýy ınvestorlar úshin kútpegen jaǵdaı bolyp, eldiń qor naryǵy men ulttyq valıýtasy kúrt qunsyzdandy. Bul týraly Reuters habarlaıdy.
Aktıvter jappaı satylǵandyqtan, bırjadaǵy saýda-sattyq ýaqytsha toqtatyldy.
26 qazan, dúısenbi kúni saýda barysynda Brazılııa realy AQSh dollaryna qatysty qunynyń 11 paıyzdan astamyn joǵaltty. Bul valıýta tarıhyndaǵy bir kún ishindegi eń iri quldyraýlardyń biri boldy. Al Bovespa negizgi qor ındeksi 15 paıyzdan astam tómendep, 1998 jyldan bergi eń úlken paıyzdyq quldyraýyn kórsetti.
Indeks aldyńǵy saýda kúniniń jabylý deńgeıimen salystyrǵanda 10 paıyzǵa tómendegen soń, Brazılııanyń B3 bırjasy saýda-sattyqty 30 mınýtqa toqtatty. Buǵan deıin baǵanyń kúrt aýytqýyn tejeý úshin jekelegen fıýcherstik kelisimsharttar boıynsha baǵanyń ózgerý shekteri keńeıtilgen edi.
Quldyraý memlekettik oblıgatsııalar naryǵyna da áser etti. Naryqtaǵy qubylmalylyqtyń kúsheıýine baılanysty Brazılııa Qarjy mınıstrligi 27 jáne 29 qazanǵa josparlanǵan memlekettik boryshtyq baǵaly qaǵazdar aýktsıondaryn ótkizýden bas tartty.
Reuters agenttiginiń habarlaýynsha, ınvestorlardyń mundaı reaktsııasy prezıdent saılaýynyń kútpegen nátıjesimen baılanysty. Birinshi týrdan keıin naryq qatysýshylary senator Flavıý Bolsonarýdyń jeńisine úmit artyp, onyń ákimshiligi bıýdjet saıasatyn qatańyraq júrgizedi dep boljaǵan.
Oxford Economics ekonomısi Maýrısıo Monjeniń aıtýynsha, Lýlanyń basty mindeti — naqty jalaqy men jumyspen qamtýdyń ósýin saqtaı otyryp, úkimettiń bıýdjet tapshylyǵyn turaqty túrde qysqarta alatynyna ınvestorlardy sendirý.
Endi naryq qatysýshylary jańa qarjy mınıstriniń taǵaıyndalýyna jáne qaıta saılanǵan prezıdenttiń ekonomıkalyq baǵdarlamasyna nazar aýdaryp otyr. Investorlar memlekettik boryshty turaqtandyrý men bıýdjet shyǵystaryn baqylaýǵa alýǵa baǵyttalǵan naqty sharalardy kútip otyr.
Buǵan deıin Lýlanyń komandasy 2030 jylǵa qaraı bıýdjet profıtsıtin jalpy ishki ónimniń shamamen 1,3 paıyzyna jetkizýdi kózdeıtinin málimdegen edi.
Eske salaıyq, Lýıs Inasıý Lýla da Sılva Brazılııadaǵy prezıdent saılaýynyń ekinshi týrynda jeńiske jetti. Eldiń Joǵarǵy saılaý sotynyń málimetinshe, hattamalardyń 97,69 paıyzy óńdelgen kezde Lýla 51,74 paıyz daýys jınasa, Flavıý Bolsonarý 48,26 paıyz daýys alǵan. Lýlanyń jańa prezıdenttik merzimi 2027 jylǵy 1 qańtarda bastalady.
Buǵan deıin Qasym-Jomart Toqaev Lýla da Sılvany prezıdent saılaýyndaǵy jeńisimen quttyqtady.
