«Lýkoıl» kompanııasy Qazaqstandaǵy aktıvterin satýy múmkin be

ASTANA. KAZINFORM – QR Energetıka vıtse-mınıstri Sanjar Jarkeshov «Lýkoıl» kompanııasynyń Qazaqstandaǵy aktıvterine qatysty pikir aıtty.

Búgin Úkimet otyrysynan keıingi baspasóz máslıhatynda tilshiler sanktsııaǵa baılanysty «Lýkoıl» kompanııasynyń halyqaralyq aktıvterin satýyna oraı suraq qoıǵan bolatyn.

«Bul turǵyda Qazaqstandaǵy jobalar bar ma?» - dep surady jýrnalıster.

Óz kezeginde S. Jarkeshov qazir bul máseleni elimizdiń Syrtqy ister mınıstrligi talqylap jatqanyn aıtty.

- Qazir aktıvterdi satý nemese satyp alý týraly aıtýǵa erte, óıtkeni jańalyq taıaýda ǵana jarııalandy. Energetıka mınıstrligi men Syrtqy ister mınıstrligi tyǵyz baılanysta jumys istep jatyr. Meniń oıymsha, jaqynda tıisti málimet beriledi, - dedi vıtse-mınıstr.

Aıta keteıik, jaqynda Reseıge qarsy sanktsııalardyń qysymymen «LÝKOIL» halyqaralyq aktıvterin satýǵa nıetti ekeni málim boldy.

Osyǵan deıin «Lýkoıl» Rýmynııa men Moldovadaǵy janarmaı quıý beketterin «QazMunaıGaz»-ǵa satýy múmkin ekeni týraly jazdyq.