Lýkashenko Nazarbaev týraly: Ol bizge baǵa jetpes kómek kórsete alady

NUR-SULTAN. QazAqparat - QR Tuńǵysh Prezıdenti - Elbasy Nursultan Nazarbaevqa Eýrazııalyq ekonomıkalyq odaq jumysyna tekserý júrgizý usynyldy. Bul týraly búgin elordada ótip jatqan Joǵary Eýrazııa ekonomıkalyq keńesiniń keńeıtilgen quramdaǵy otyrysynda Belarýs Respýblıkasynyń Prezıdenti Aleksandr Lýkashenko aıtty, dep habarlaıdy QazAqparat tilshisi.

"Shaǵyn quramdaǵy otyrys barysynda men Nursultan Ábishulyna odaq aıasynda bizdiń ne istegenimizge, neni isteı almaǵanymyzǵa tekserý júrgizýdi usynǵan edim. Bizdiń komıssııalardyń kadrlyq quramynan bastap, qyzmetimizdiń strategııalyq baǵyttaryna deıin. Mine osy jerde ol bizge baǵa jetpes kómek kórsete alady. Muny keshe Qazaqstannyń Prezıdenti bolyp, keıin ókilettigin toqtatqan adamǵa syılyq dep oılamaý kerek. Biz odan odaǵymyz úshin qajetti kóptegen dúnıeniń barlyǵyn "syǵyp" ala alamyz", - dedi A.Lýkashenko.

Sonymen qatar, Belarýs Prezıdenti QR Tuńǵysh Prezıdenti - Elbasynyń janynda bilikti mamandardyń kóp ekendigin basa aıtty.

"Olar Elbasy Prezıdent bolǵan kezde óte baıypty jumys atqardy. Jáne biz olardy joǵaltyp almaýymyz kerek", - dedi ol.

Aıta keteıik, keńestiń keńeıtilgen quramdaǵy otyrysyna Qazaqstan Respýblıkasynyń Tuńǵysh Prezıdenti - Elbasy Nursultan Nazarbaev, Qyrǵyz Respýblıkasynyń Prezıdenti Sooronbaı Jeenbekov, RF Prezıdenti Vladımır Pýtın, Armenııa Respýblıkasynyń Premer-mınıstri Nıkol Pashınıan, sonymen qatar Moldova Respýblıkasynyń Prezıdenti Igor Dodon EAEO janyndaǵy baqylaýshy memlekettiń basshysy retinde, Tájikstan Respýblıkasynyń Prezıdenti Emomalı Rahmon qurmetti qonaq retinde qatysty.