Lýıs Sýares 2 jylǵa fýtboldan shettetilýi múmkin
ASTANA. QazAqparat - Halyqaralyq fýtbol federatsııasy (FIFA) Brazılııada ótip jatqan álem chempıonatynyń toptyq kezeńiniń matchynda Italııa komandasynyń qorǵaýshysy Djordjıo Kellınıdi tistep alǵan Ýrýgvaı quramasynyń shabýylshysy Lýıs Sýareske qatysty tártiptik is qozǵady. Bul týraly federatsııanyń saıtynda habarlandy.
FIFA erejelerine sáıkes, osyndaı tártip buzýshylyq úshin fýtbolshyǵa 24 matchqa, ıaǵnı 2 jylǵa deıin oıynnan shettetý jazasy qoldanylady. Sarapshylar óte qatań jaza qoldanylmaıdy jáne Sýaresti budan áldeqaıda jeńil aıyp kútip tur dep topshylaýda. Aıta keteıik, ýrýgvaılyq shabýylshy buǵan deıin de óz qarsylastaryna birneshe ret tis batyryp kórgen. Osyǵan uqsas oqıǵa birinshi ret 2010 jyly boldy. Ol kezde Gollandııanyń «Aıaks» komandasy sapynda oınap júrgen Sýares PSV oıynshysy Otman Bakkaldy tistep aldy. Keıin Anglııanyń «Lıverpýl» komandasyna aýysqan shabýylshy 2013 jyly «Chelsıdiń» qorǵaýshysy Branıslav Ivanovıchti ıyǵynan tistep aldy. Sol úshin Anglııa fýtbol qaýymdastyǵy Sýaresti on matchqa qatystyrmaı qoıǵan bolatyn.
