Lufthansa jáne Eurowings ushqyshtary ereýilge shyqpaq
ASTANA. KAZINFORM — Vereinigung Cockpit kásipodaǵy Lufthansa jáne Eurowings áýe kompanııalarynyń ushqyshtaryn 13–14 sáýir kúnderi ereýil ótkizýge shaqyrdy. Al avıakompanııa bul talaptardy «aqylǵa qonymsyz jáne oryndalmaıtyn» dep baǵalady, dep habarlaıdy DW agenttigi.
Lufthansa, sondaı-aq oǵan qarasty Lufthansa Cargo, CityLine jáne Eurowings áýe kompanııalarynyń ushqyshtary 13 jáne 14 sáýirde ereýil ótkizedi. Bul týraly Germanııanyń ushqyshtar men avıaınjenerler kásipodaǵy Vereinigung Cockpit 11 sáýir, senbi kúni resmı saıtynda jarııalady.
Atap aıtqanda, 13 sáýirde Germanııa áýejaılarynan ushatyn Eurowings reısteriniń barlyǵyna ereýil áser etedi. Degenmen, Taıaý Shyǵystaǵy turaqsyz jaǵdaıǵa baılanysty Germanııadan Ázerbaıjan, Bahreın, Mysyr, Izraıl, Iordanııa, Irak, Iemen, Katar, Kýveıt, Lıvan, Oman, Saýd Arabııasy jáne Birikken Arab Ámirlikterine ushatyn Lufthansa, Cargo jáne CityLine ushqyshtary ereýilden bosatylady.
— Vereinigung Cockpit kásipodaǵy bul qadamǵa jumys berýshiler birneshe eńbek daýy boıynsha naqty sheshim usynýǵa daıyndyq tanytpaǵannan keıin májbúr boldy. Pasha merekesi kezinde ereýil jasamaý týraly sanaly sheshim qabyldanǵanyna qaramastan, taraptardan mańyzdy usynystar túspedi. Jumys berýshiler tarapynan jaýap ta, kelissóz júrgizýge daıyndyq ta baıqalmady, — dedi VC tóraǵasy Andreas Pıneırý.
Kásipodaqty Lufthansa-nyń zeınetaqy baǵdarlamalary qanaǵattandyrmady
Kásipodaq ókilderiniń aıtýynsha, ereýilge shaqyrýdyń basty sebebi — Lufthansa jáne Lufthansa Cargo tarapynan korporatıvtik zeınetaqy baǵdarlamalary boıynsha usynystardyń bolmaýy. Sondaı-aq CityLine kompanııasynyń ujymdyq kelisimshartqa qatysty usynystary da jetkiliksiz. Al Eurowings usynǵan zeınetaqy baǵdarlamasy múlde qabyldaýǵa kelmeıdi jáne tym tómen deńgeıde ekeni atap ótildi.
Pıneırý ereýildi «sátsiz kelissózderdi saqtap qalýǵa baǵyttalǵan sońǵy shara» dep atap, jaýapkershilikti jumys berýshige júktedi. Sonymen qatar, VC múshelerin 15 sáýirde Frankfýrt-na-Maın áýejaıyndaǵy Lufthansa keńsesi aldynda ótetin bortserikterdiń UFO kásipodaǵynyń mıtıngine qatysýǵa shaqyrdy. Aıta keteıik, 10 sáýirde UFO ótkizgen ereýil júzdegen reıstiń toqtatylýyna sebep bolǵan.
Lufthansa VC josparyn synǵa aldy
Lufthansa ókilderi VC-niń ereýil ótkizý týraly sheshimin qatań synǵa alyp, ony «shıelenistiń múlde jańa deńgeıi» dep atady. Áýe kompanııasynyń málimdeýinshe, kásipodaqtyń negizgi talaby — «onsyz da joǵary deńgeıdegi zeınetaqy baǵdarlamasyn eki esege arttyrý» — «aqylǵa qonymsyz ári oryndalmaıtyn» talap.
Buǵan deıin Lufthansa kompanııasyndaǵy ereýilder Germanııa boıynsha kóptegen reısterdiń toqtatylýyna ákelgen edi.
Buǵan deıin Lufthansa reısterinde tazalaý erejeleri ózgeredi.