Lufthansa taǵy 4 000 jumys ornyn qysqartpaq

ASTANA. KAZINFORM — Qysqartý 2030 jylǵa deıin júzege asyrylady. Germanııanyń iri áýe kompanııasy joǵary shyǵyndarmen kúresip, ótken jyly paıdasynyń tómendeýin tirkedi, dep habarlaıdy Euronews.

Lufthansa kompanııasy 2030 jylǵa deıin ákimshilik apparatta shamamen 4 myń jumys ornyn qysqartý nıetin jarııalady. Únemdeý tsıfrlandyrý, avtomattandyrý jáne úderisterdiń tıimdiligin arttyrý esebinen júzege aspaq.

Germanııanyń eń iri áýe kompanııasy Lufthansa biraz ýaqyttan beri paıdasynyń azaıýy men shyǵyndardyń kóbeıýimen kúresip keledi. Juma kúni kompanııadaǵy derekkózder aldaǵy jyldary Lufthansa ákimshilik apparatynyń shamamen 20 paıyzǵa qysqaratynyn habarlady.

Dúısenbi kúni Mıýnhende ınvestorlarǵa arnalǵan is-sharada kompanııa shyǵyndardy azaıtý josparyn usynbaq.

Joǵary paıda: Lufthansa ázirge tótep berip tur

Sonymen birge kontsern orta merzimdi kezeńge arnalǵan tabystyń maqsatty kórsetkishin joǵarylatty. Kompanııanyń óz málimetine sáıkes, 2028 jyldan bastap Lufthansa satylymnan túsken paıdany segizden on paıyzǵa deıin jetkizýdi kózdep otyr. Buǵan deıingi meje segiz paıyz bolǵan, alaıda joǵary shyǵynǵa baılanysty sırek oryndalǵan.

AirFrance-KLM nemese British Airways kompanııalarymen salystyrǵanda Lufthansa sońǵy jyldary óz pozıtsııasyn qalpyna keltirýde qınalyp keledi. Kompanııa kórsetkishteri koronavırýs pandemııasyna deıingi 2019 jylǵy deńgeıden áli tómen.

Bir jyldan sál asa ýaqyt buryn Lufthansa shyǵyndy qysqartýǵa jáne kiristi arttyrýǵa baǵyttalǵan qaıta qurylymdaý baǵdarlamasyn iske asyrǵan edi. Alaıda kútken nátıje ázirge baıqalǵan joq.

Germanııada Lufthansa kompanııasynda 100 myńnan astam adam jumys isteıdi, onyń ishinde 15 myńǵa jýyǵy ákimshilik salada eńbek etedi. 

Aıta ketelik «Lufthansa» áýe kompanııasynyń Qazaqstanǵa reısin toqtatý sebebi aıtylǵan edi.