Lufthansa kompanııasy Qazaqstanǵa reısterdi ýaqytsha toqtatty

NUR-SULTAN. QazAqparat – 2020 jyldyń 11 naýryzy men 24 sáýiri aralyǵynda Lufthansa nemis áýe kompanııasy Qazaqstanǵa reısterdi ýaqytsha toqtatty, dep habarlaıdy QazAqparatAzamattyq avıatsııa komıtetine silteme jasap.

«Búgingi kúnge deıin áýe kompanııasy Frankfýrt-Almaty-Frankfýrt (aptasyna 4 ret) jáne Frankfýrt-Almaty-Nur-Sultan (aptasyna 3 ret) baǵyttary boıynsha turaqty reısterdi oryndady. Aldyn ala aqparat boıynsha, áýe tasymaldaýshy osy baǵyttar boıynsha ushýlardy 2020 jyldyń 25 sáýirinen bastap jańartýdy kózdep otyr», delingen habarlamada.

Áýe kompanııanyń aqparaty boıynsha, atalǵan kezeńde avıabıletteri bar jolaýshylar bıletterdi tolyq kólemde qaıtara alady.
«2020 jylǵy 3 naýryzdan bastap «Qazaqstannyń avıatsııalyq ákimshiligi« AQ bazasynda koronavırýsqa qatysty jaǵdaıdy baqylaýǵa baǵyttalǵan ahýaldyq ortalyq josparly túrde jumys isteı bastady. Ortalyqta Qazaqstanǵa turaqty jáne turaqty emes áýe qatynastary bar elderde ınfektsııa juqtyrǵan adamdardyń statıstıkasyna baqylaý júrgiziledi», delingen habarlamada.
Jolaýshylar áýe bıletterin qaıtarý boıynsha «Qazaqstannyń avıatsııalyq ákimshiligi» kompanııasynyń 8 (7172) 64 58 41 nómiri boıynsha qaýyrt jelisine habarlasýy kerek. Baılanys telefony jumys kúnderi (5/2) saǵat 9.00-dan 18.00-ge deıin isteıdi.