Lufthansa Germanııanyń barlyq týrısteriniń otanyna oralýyna kepildik beredi
BERLIN. QazAqparat Germanııanyń iri Lufthansa avıakompanııasy shetelge baratyn barlyq nemis týrısteriniń otanyna oralýyna kepildik berýge daıyn. Bul týraly avıakompanııa basshysy Karsten Shpor jeksenbi kúni Frankfurter Allgemeine Zeitung gazetine bergen suhbatynda málimdedi.
«Kim úıine qaıtqysy kelse, ony biz qaıtaramyz», - dep ýáde berdi ol.
«Temperatýrasynyń kóterilýine baılanysty adam qabyldaýshy elge kire almaǵan jáne sol elde karantınge tap bolǵan jaǵdaıda nemese vırýs saldarynan aýrý týyndaǵan jaǵdaıda bolsyn –bárinde de keri ushýǵa kepildik beriletin bolady»,- dep túsindirdi Shpor.
Lufthansa kontserni koronavırýs pandemııasy saldarynan jolaýshylar aǵynynyń qysqarýyna baılanysty orasan zor shyǵynǵa ushyraýda, bul kompanııa aktsııalary baǵamynyń tómendeýine ákelip soqtyrdy. Kompanııanyń derekteri boıynsha saǵatyna ol shamamen €1 mln joǵaltýda. Osy aıda avıatasymaldaýshy ushý sanyn barynsha arttyrýǵa nıettenip otyr.
25 mamyrda Germanııa úkimeti Lufthansa kompanııasymen €9 mlrd mólsherinde kómek paketin usyný sharttaryn kelisti. Degenmen osy mámileni maquldaýy tıis Eýrokomıssııa mynandaı shart qoıdy: Germanııanyń Maındaǵy Frankfýrt jáne Mıýnhen sekildi iri áýejaılarynda avıakompanııa ushaqtarynan ushý jáne qoný kezinde basym quqyqtar alynsyn.
Lufthansa aktsıonerleri 25 maýsymda ótetin kezekten tys otyrysta kómek paketin talqylaıtyn bolady.
