Lufthansa enshisindegi CityLine kompanııasynyń jumysyn toqtatady
ASTANA. KAZINFORM — Germanııanyń Lufthansa áýe kontserni ózine qarasty Lufthansa CityLine kompanııasynyń qyzmetin toqtatyp, qyzmetkerlerin jumystan bosatatynyn málimdedi. Bul týraly BELTA Handelsblatt basylymy kompanııanyń ishki qujatyna silteme jasap habarlady.
Qujatta bul sheshim Lufthansa-daǵy jalǵasyp jatqan ereýilderge baılanysty qabyldanǵany aıtylǵan. Sırek jaǵdaılardy qospaǵanda, CityLine qyzmetkerleriniń barlyǵy jumystan bosatylady. Áýe kompanııasynyń ókili bul aqparatty rastady.
Reuters agenttiginiń habarlaýynsha, osy aptada CityLine kompanııasynyń 27 ushaǵy tolyqtaı paıdalanýdan shyǵarylady. Sonymen qatar, jazǵy maýsym aıaqtalǵan soń Lufthansa negizgi áýe parkinen Airbus A340-600 úlgisindegi tórt alys qashyqtyqqa ushatyn ushaqty shyǵarýdy josparlap otyr. 2026/2027 jylǵy qysqy kestede qysqa jáne orta qashyqtyqtaǵy reıster sany qysqarady.
Kompanııanyń resmı saıtyndaǵy málimetke sáıkes, Lufthansa CityLine áýe parki shamamen 30 ushaqtan turady.
Buǵan deıin aýqymdy ereýil saldarynan 16 sáýir kúni Frankfýrt-na-Maıne qalasynda josparlanǵan shamamen 1,3 myń reıstiń keminde 656-sy toqtatylǵany habarlanǵan edi. Ereýil tórtinshi kún qatarynan jalǵasyp jatyr: dúısenbi men seısenbide ushqyshtar, al sársenbi men beısenbide bortserikter narazylyq aktsııasyna qosylǵan.
Alǵashynda ushqyshtar ereýildi sársenbide aıaqtaýy tıis bolǵan, alaıda kásipodaq pen kompanııa basshylyǵy arasyndaǵy kelissózderdiń nátıje bermeýine baılanysty aktsııa 17 sáýirge deıin uzartyldy.
Jyl basynan beri Lufthansa kásipodaqtary birneshe iri ereýil ótkizgen. Jalaqy men áleýmettik tólemderge qatysty kelispeýshilikterden týyndaǵan eńbek daýy Taıaý Shyǵystaǵy jaǵdaıdyń ýshyǵýynan týyndaǵan energetıkalyq daǵdarys aıasynda, sondaı-aq áýe kompanııasynyń 100 jyldyq mereıtoıy kezinde jalǵasyp otyr.
Eske sala keteıik, buǵan deıin Lufthansa taǵy 4 000 jumys ornyn qysqartýǵa nıetti ekenin jazdyq.
