Lufthansa áýe kompanııasynyń ushqyshtary jumysqa shyǵýdan bas tartty
ASTANA. QazAqparat - Germanııada jalaqysyna kóńilderi tolmaıtyn ushqyshtar taǵy da kóterildi. Lufthansa áýe kompanııasynyń qyzmetkerleri biraýyzdan jumysqa shyǵýdan bas tartqan. Nátıjesinde eki kúnniń ishinde bul elde eki myńǵa tarta reıs keıinge shegerildi, dep habarlaıdy 24 kz.
Lufthansa áýe kompanııasynyń jolaýshylary eki apta boıy qalaǵan baǵyttaryna usha almaı otyr. Eki kúnniń ishinde Germanııada sharasyz qalǵan 180 myń adam ózge kompanııalardyń qyzmetine júginip nemese poezǵa bılet alýǵa májbúr.
«Búgin biz taǵy da kóptegen reısti shegerýge májbúrmiz. Endi arnaıy tártiptegi jospar boıynsha jumys isteýimiz kerek. Qazir biz jolaýshylardy úıinen áýejaıǵa kelmes buryn reıster ýaqytsha toqtatylǵany týraly habarlama taratyp jatyrmyz. Al óz kezeginde ushqyshtar óz quqyn sońyna deıin qorǵaýǵa bel sheship kirisken. Olar sońǵy tórt jyl boıy alǵan jalaqylaryna 3,7% kóterme aqsha talap etip otyr. Aıtalyq qazir Germanııada tájirıbeli ushqyshtar jylyna 250 myń eýro tabys tabady»,-deıdi Lufthansa áýe kompanııasynyń ókili Martın Lıýtke.
«Meniń oıymsha, bul túıitkildi sheshetin ýaqyt jetti. Biz uzaq kúrestik. Al eki jaqtyń tartysynan qarapaıym jolaýshylar japa shegedi ǵoı. Alaıda, biz bul másele sheshilmeıinshe Lufthansa-ǵa qysym kórsetýdi jalǵastyra beremiz. Eýropadaǵy iri áýekompanııa qazirdiń ózinde qomaqty shyǵynǵa batty. Lufthansa-nyń ózge de qyzmetkerleri jipsiz baılanyp otyr. Jumysynan aıyrylýdy qalamaıtyn kompanııanyń ókilderi endi ushqyshtardyń ózine qarsy narazylyqqa shyǵýǵa daıyn»,-deıdi kompanııanyń kásipodaq ókili Vınfrıd Shtraıher,
