Lufthansa áýe kompanııasy qazaqstandyq jolaýshylarǵa ótemaqy tóleıdi

ASTANA. KAZINFORM – Qazaqstan soty nemistiń Lufthansa áýe kompanııasyn jolaýshylarǵa keltirilgen materıaldyq shyǵyndy jáne moraldyq zııan úshin ótemaqy tóleýge mindettedi.

Bul týraly advokat Danılhan Shaǵataev óziniń Telegram-arnasynda jazdy.

2023 jyldyń jeltoqsanynda Frankfýrt-na-Maıneden Almatyǵa ushqan kompanııanyń ushaǵy tehnıkalyq sebepterge baılanysty Astanaǵa qonǵan.

— Sol kezde jolaýshylarǵa ystyq tamaq, salqyn sýsyn, qonaqúı jáne transfer qarastyrylmady. Áýe kompanııasynyń ókilderi tarapynan eshqandaı aqparat nemese túsinikteme berilmedi. Sońynda áýe kompanııasynyń ókili jolaýshylarǵa óz betterinshe basqa reıske bılet satyp alýǵa keńes aıtqan, al áýe kompanııa keıinirek bul bıletterdiń qunyn óteımiz dep ýáde bergen. Jolaýshylar 2023 jyldyń 22 jeltoqsanyndaǵy eń jaqyn reıske FlyArystan áýe kompanııasynyń bıletterin ózderi satyp alǵan. Sonymen qatar, olar qonaqúı men júktiń artyq salmaǵy úshin de aqy tóleýge májbúr boldy, — dedi advokat.

Áýe kompanııasynyń ókili bılet qunyn óteýge ýáde bergenimen, jolaýshylarǵa eshteńe ótelmegen. Olar bir jarym jyl boıy Azamattyq avıatsııa komıtetine shaǵym jazyp kelgen, biraq nátıje bolmaǵan.

Qazaqstan Respýblıkasy qatysýshy bolyp otyrǵan Monreal konventsııasyna sáıkes, qazaqstandyqtardyń sheteldik áýe kompanııaǵa qarsy shaǵymyn Almaty qalasynyń Túrksib aýdandyq soty qarady.

Sottyń sheshimi boıynsha, Lufthansa ár jolaýshyǵa satyp alynǵan bıletterdiń qunyn, qonaqúıge jáne artyq júkke ketken shyǵyndardy, moraldyq zııandy jáne sot shyǵyndaryn óteýi tıis. Sheshim zańdy kúshine engen joq.