Lýdomanııa er adamdardyń potentsııasyn álsiretip jiberedi — addıktolog

ASTANA. KAZINFORM — Lýdomanııa densaýlyqqa tikeleı zardabyn tıgizedi. Adamnyń asqorytý qyzmeti, uıqysy buzylyp, tipten jynystyq qumarlyǵy joǵalyp ketedi. Bul týraly Kazinform-nyń YouTube arnasyndaǵy Bızdıñ orta podkastynda Statsıonarlyq emdeý klınıkasynyń addıktolog mamany Azamat Sovetbekov aıtty.

21-ǵasyr derti atalǵan lýdomanııa týraly jazǵanda kópshilik máseleniń ózderine kóringen betki jaǵyna ǵana toqtalatyn kórinedi. ıAǵnı, qumar oıynǵa salynǵan adam qaıta-qaıta qaryz suraıtyny, bireýlerdi aldap, atyna nesıe aldyratyny, óziniń jáne jaqyndarynyń qundy zattaryn satý, urlyq jasaý syndy jaman ádetterge boı aldyratyny jıi aıtylady. Addıktolog Azamat Sovetbekovtiń aıtýynsha, bul máseleniń zardaby tek birjaqty bolmaıdy.

— Lýdomanııa — aýrý, dert. Búgingi tańda kóptegen otbasynyń bir adamynda osy qumar oıynyna táýeldilik bar. Ony biri ashyp aıtsa, biri jasyryp otyr. Qumar oıynǵa salynǵan adamnyń búkil energııasy qumar oıyndaryn oılaýǵa, onda qandaı koeffıtsıent qoısam bolady degen joramaldar jasaýǵa jumsalady. Qaı jerden qandaı zatty qalaı urlasam bolady, basqa adamnyń atyna kredıtti qalaı aldyrsam bolady degen oımen kúnderi óte beredi. Bul onyń psıhıkasyna tikeleı áser etedi. Kúsh-jigeri bolashaqty josparlaý, alǵa maqsat qoıý, ózin damytý, adamdarmen qarym-qatynasyn arttyrý jaǵyna jumsalmaıdy, — deıdi ol.

Táýeldilikpen kúres mamany qumar oıynǵa salynǵan jannyń densaýlyǵyna da orasan zor zııan keletinin aıtady.

— Tamaqtaný rejımi buzylady. Lýdoman eki-úsh kún boıy energetıkalyq sýsyndar iship, tamaqtanbaı júre beredi. Kóp aqsha utam, sosyn bir jaqsy jerge baryp tamaqtanam degen oıda bolady. Osylaı asqazanyn qurtady. Árdaıym telefonda otyryp, oıynnyń barysyn baǵyp otyrý kózin álsiretedi. Oıynqumar jan kóbinde kúndiz uıyqtaıdy, túnde bás tigedi. Kúndiz eshkimniń kózine kórinbeýge tyrysady. Qaryzdary kóp bolǵandyqtan, túnde ony kóp eshkim baıqamaıdy dep sanaıdy, — deıdi Azamat Sovetbekov.

Onyń aıtýynsha, lýdomanııa er adamdardyń potentsııasyn tómendetip jiberedi eken. Tipti, keıbir patsıentterdiń múlde jynystyq qumarlyǵy joǵalǵany baıqalǵan.

— Qumar oıyny er adamdardyń potentsııasyna tikeleı áser etedi. Lýdomandarmen jumys istegen 7 jyldyń ishinde talaı adammen sóılesip, jaǵdaıymen tanystyq. Sonda bir baıqaǵanymyz, lýdomandardyń jynystyq qumarlyǵy joǵalyp ketedi. Qumar oıynynyń kesirinen qanshama erli-zaıypty ajyrasyp jatyr. Onyń birden-bir sebepteri — qaryzǵa batý, ózine otbasylyq jaýapkershilikti almaý, úıde qonbaýy bolsa, endi bir sebebi — potentsııasynyń álsireýi. Osynyń bári birigip, ajyrasý jaǵdaıyna alyp kelip otyr, — dedi addıktolog.

Aıta keteıik, buǵan deıin lýdomanııadan qalaı emdelýge bolatyny jaıly jazǵan edik.