LRT júıesinde qaýipsizdik erejesin buzǵan jolaýshylar beınebaqylaý arqyly anyqtalyp jatyr
ASTANA. KAZINFORM – LRT júıesinde jolaýshylar tarapynan qaýipsizdik erejelerin buzý jaǵdaılary tirkeldi. Bul týraly City Transportation Systems mekemesi habarlady.
Atap aıtqanda, jolaýshylar arasynda kelesi qaýipsizdik buzýshylyqtary bolǵan:
– stansa platformasyndaǵy shuǵyl tejeý batyrmasyn negizsiz basý;
– poıyz ishinde qorǵanysh áınektiń artyndaǵy platformalyq esikterdi ashý úshin arnalǵan shuǵyl batyrmany iske qosý;
– vagon esikterin ishten óz betinshe ashýǵa áreket jasaý;
– esik jaqtaýlarynyń arasyna qol salyp, esikterdiń jabylýyna kedergi keltirý.
– LRT júıesi tolyq avtomattandyrylǵandyqtan, mundaı áreketter qaýipsizdik qateri retinde qaralady. Bul poıyzdyń toqtaýyna jáne dıspetcherlik qyzmettiń qosymsha tekserýler júrgizýine ákeledi. Jolaýshylardan LRT paıdalaný kezinde qaýipsizdik erejelerin qatań saqtaýdy suraımyz. Jeliniń kerneý astynda ekenin eskerińiz. Árbir poıyz quramynda operator bar, ol tek elektr qýaty óshirilgennen keıin esikterdi asha alady, - delingen habarlamada.
Aıta keteıik, qaýipsizdik erejelerin buzǵandar stansalar men vagondardaǵy beınebaqylaý kameralary arqyly anyqtalady. Bul jaǵdaılar boıynsha materıaldar quqyq qorǵaý organdaryna qylmystyq jaýapkershilikke tartý úshin joldanady.
Eske salsaq, buǵan deıin Astanadaǵy júrgizýshisiz LRT poıyzdary qalaı jumys isteıtinin jazǵanbyz.
