LRT jelisiniń sońǵy aıaldamasy qala kireberisinde bolady — Azamat Qapyshev
ASTANA. KAZINFORM- Astana men Qosshyny baılanystyratyn Tarlan Astana LRT jelisiniń ekinshi kezeńi Qosshy qalasynyń kireberisine deıin ǵana jetedi. Bul týraly Qosshy qalasynyń ákimi Azamat Qapyshev málimdedi.
Ákimniń aıtýynsha, LRT jelisin qalanyń ishine deıin tartý josparlanbaǵan.
Onyń túsindirýinshe, buǵan ınjenerlik ınfraqurylymnyń ereksheligi sebep bolǵan.
— Qala aýmaǵynda ınjenerlik jeliler óte kóp ári bir-birine tym jaqyn ornalasqan. Sondyqtan LRT jelisin qalanyń ishi arqyly júrgizý múmkin bolmady, — dedi Azamat Qapyshev.
Ákimniń sózinshe, LRT jelisiniń sońǵy stantsııasy Qosshy qalasynyń kireberisinde ornalasady.
— LRT stantsııasy «Qosshy» degen jazýy bar stelanyń mańynda, ıaǵnı qalaǵa kireberiste ornalasady. Polıtsııa beketi men qalaǵa burylatyn joldyń tusy. Sońǵy aıaldama dál sol jerde bolady, — dedi qala ákimi.
Aıta keteıik, Astanada Qosshy men oń jaǵalaýǵa arnalǵan eki deńgeıli LRT stantsııasy salynady.
Oǵan qosa, Astanadan Qosshyǵa deıingi LRT jelisiniń qurylysy 2027 jyly aıaqtalatynyn jazǵanbyz.
