LRT jelisi 2027 jyldyń sońynda iske qosylady - Almaty ákimdigi

Almaty ákimdiginiń málimetinshe, qazirgi kezeńde negizgi jumystar Baýyrjan Momyshuly jáne Tóle bı kóshelerin qamtyǵan. Munda relster salynatyn aýmaqty daıyndaý jáne qurylys aımaǵyna kiretin ınjenerlik kommýnıkatsııalardy qaıta ornalastyrý jumystary qolǵa alynǵan.

- Joba aıasynda barlyǵy 375 ınjenerlik jelini, onyń ishinde: jylý, baılanys, sýmen jabdyqtaý jáne káriz, nóser kárizi, gazben jáne elektrmen jabdyqtaý jelilerin qaıta ornalastyrý kózdelgen, - dep habarlady ákimdikten.

Bolashaq depo ornalasatyn aýmaqty qosa alǵanda Baýyrjan Momyshuly kóshesinde 39 ınjenerlik kommýnıkatsııa qaıta ornalastyrylady. Qazir onyń tórteýi boıynsha jumys aıaqtalǵan. Tóle bı kóshesinde 269 jelini qaıta ornalastyrý qajet bolsa, onyń 34-i boıynsha jumystar aıaqtaldy. Abylaı han dańǵylynda taǵy 67 ınjenerlik jelini qaıta ornalastyrý kózdelgen.

- Injenerlik jelilerdi qaıta ornalastyrý – LRT jelisi ótetin aýmaqty daıyndaýdyń qajetti kezeńi. Keıbir ýchaskeler bosatylǵan saıyn jeli qurylymdaryn ornatý, shpal men rels tóseý jáne basqa da jumystar bastalady, - dep túsindirdik ákimdikten.

Sondaı-aq qala basshylyǵy qurylys-montaj jumystary qys mezgilinde de jalǵasatynyn atap ótti. Resmı málimetke sáıkes, temperatýra tómendegen kezde topyraqty qorǵaý, qysqy jaǵdaıda beton quıý, qurylymdardy jylylaý jáne betonnyń qajetti beriktikke jetýin qamtamasyz etýge baǵyttalǵan arnaıy tehnologııalyq sharalar qoldanylady.

LRT jelisiniń birinshi kezeńi tolyǵymen jerústi baǵytta bolady. Joba aıasynda estakada salý josparlanbaǵan. LRT iske qosylǵannan keıin Momyshuly jáne Tóle bı kóshelerindegi joldyń ortańǵy eki jolaǵy tek jeńil relsti poıyzdardyń qozǵalysyna beriledi. Olar jıektastar arqyly oqshaýlanbaq. Al LRT poıyzdarynyń eń joǵary tehnıkalyq jyldamdyǵy 65-70 km/saǵ bolsa da, aıaldamalar arasyndaǵy ortasha qashyqtyq shamamen 700 metr bolǵandyqtan, poıyzdardyń ortasha qozǵalys jyldamdyǵy 30-35 km/saǵ deńgeıinde bolady.

- LRT birinshi jelisin 2027 jyldyń sońynda iske qosý josparlanyp otyr. Bul merzim qajetti kólemdegi jyljymaly quramdy daıyndaý jáne jetkizý kestesine baılanysty ózgerýi múmkin, - dep habarlady ákimdikten.

Jobalyq sheshimge sáıkes, LRT birinshi jelisiniń birinshi kezeńi Alataý aýdanyndaǵy ındýstrııalyq aımaqta, Móńke bı jáne Momyshuly kósheleriniń mańynda ornalasatyn depodan bastalady. Jeli Momyshuly kóshesimen Tóle bı kóshesine, odan ári shyǵys baǵytta Abylaı han dańǵylyna jalǵasady. «Almaty-2» temirjol vokzaly janynda sońǵy stantsııa retinde «Raıymbek batyr» kólik-aýysý toraby qarastyrylǵan.

Eske salaıyq, 2026 jyldyń basynda Almatydaǵy LRT jobasynyń tehnıkalyq-ekonomıkalyq negizdemesi ázirlendi.

Bıyl sáýir aıynda Almatyda burynǵy tramvaı relsteri alynyp, LRT qurylysyna daıyndyq bastaldy.

Shilde aıynda Almatyda LRT qurylysyna daıyndyqtyń jańa kezeńi bastalǵany habarlandy.

Buǵan deıin Almatyda LRT jelisin kim salatynyn jáne qansha qarajat bólingenin jazǵanbyz.