LRT vagondarynda Wi-Fi bola ma
ASTANA. KAZINFORM — Astanada jeńil relsti kólik (LRT) jelisine alǵashqy eki quram ornatyldy. Kazinform agenttiginiń tilshisi vagondar qanshalyqty yńǵaıly jáne qys mezgilinde qalaı jumys isteıtinin anyqtaǵan edi.
Jolaýshylarǵa arnalǵan jaılylyq
City Transportation Systems kompanııasynyń málimetinshe, bir quramnyń jalpy syıymdylyǵy — 600-den astam adam (1 sharshy metrge 6 adam esebimen).
Múmkindigi shekteýli jandar úshin birinshi jáne tórtinshi vagonda arnaıy 2 oryn qarastyrylǵan jáne yńǵaıly arnaıy taqtaısha qoıylǵan.
Wi-Fi bola ma?
LRT poıyzdarynda Wi-Fi jelisine qosylý qarastyrylmaǵan, sebebi búkil jeli estakada boıymen ótedi. Sondaı-aq vagondarda USB-qýattaǵyshtar da ornatylmaǵan.
Nelikten júrgizýshisiz poıyzǵa qar tazalaýshy kerek?
LRT poıyzdary avtomatty túrde basqarylatyn bolsa da, aldyńǵy terezelerdiń qaryn tazalaıtyn jumysshy bolady. CTS kompanııasynyń aqparatyna súıensek, aldyńǵy tereze astynda poıyzdardy avtomatty basqarýǵa arnalǵan kameralar men datchıkter bar. Atalǵan qurylǵylardyń durys jumys isteýi úshin, kórý aımaǵy taza bolýy qajet.
Qysta LRT quramy qalaı qyzmet kórsetedi
Qystyń kúnderi burmalar men rels joldaryn muz ben qar basyp qalmaýy úshin elektrli úrleý júıesi qoldanylady. Mamandardyń aıtýynsha, atalǵan júıe zamanaýı metropolıten jelilerinde jáne basqa elderdiń LRT jelilerinde tıimdiligin dáleldegen.
Bir apta buryn Astanada LRT-nyń ekinshi quramy qoıyldy.
Maýsymda № 101 stantsııasyna alǵashqy LRT quramy kóterildi.
Aıta keteıik, elorda ákimi Jeńis Qasymbek 2026 jyldyń 1-toqsanynda LRT resmı iske qosylatynyn málimdedi.