LRT táýligine 25 myń jolaýshy tasymaldaıdy – Astana ákimdigi

Qazirgi jolaýshylar aǵynyn taldaý nátıjesinde LRT-ny táýligine 25 myń adam qoldanady dep josparlanyp otyr. Bul týraly Astana qalasy ákimdiginiń Kazinform tilshisi joldaǵan resmı saýalynyń jaýabynda aıtylǵan. 

«Qazaqstandaǵy LRT-ny salýda CRRC Tangshan Co., Ltd» óndirýshi zaýyttyń «TRITON» modeli qarastyrylǵan. Onyń Qytaıda 100 jyldan astam tarıhy bar. Qýaty 115 KW jáne maksımaldy syıymdylyǵy – 652 adam, maksımaldy jyldamdyǵy – 80 km/saǵ. Quramdar tolyǵymen avtomattandyrylǵan jáne pılotsyz, ıaǵnı operatorsyz qashyqtan basqarý arqyly júredi. Qazirgi jolaýshylar aǵynyn taldaý nátıjesinde LRT-ny táýligine 25 myń adam qoldanady dep kútiledi», - delingen habarlamada.

Ákimdik aqparatyna sáıkes, LRT stantsııalarynda barlyq qaýipsizdik pen qoljetimdilik talaptary saqtalady.

«Bıletterdi satyp alý, avtomattandyrylǵan túrde de, saýda alańdary men sanıtarlyq-gıgıenalyq toraptary bar kútý zaldary jáne adamdardyń ózdiginen shyǵýyna jol bermeıtin júıeler qarastyrylǵan. Stantsııaǵa kóterilý úshin eskalatorlar jáne múgedek jandar arnalǵan lıftter bolady», - deıdi vedomstvodan.

Odan bólek, Qabanbaı batyr dańǵyly boıynda 10 jerasty jaıaý júrginshiler ótkeli jáne Syǵanaq pen Sh.Qaldaıaqov kóshelerinde 7 jerústi ótkelderi salynatyny aıtyldy.

LRT qurylysy boıynsha Astanada Syǵanaq, Túrkistan kóshesindegi qozǵalysy qaıta ashylatyny týraly habarlaǵan edik.