LRT iske qosylǵannan keıin Astanada jyljymaıtyn múlik baǵasy óse me
ASTANA. KAZINFORM – Astanada LRT iske qosylǵannan keıin stantsııalar mańyndaǵy jyljymaıtyn múlik baǵasy ósýi múmkin. Bul týraly City Transportation Systems basqarma tóraǵasy Asylbek Dúısebaev málimdedi.
Dúısebaevtyń aıtýynsha, LRT jelileri salynǵan aımaqtarda jyljymaıtyn múlik baǵasynyń ósýi álemdik tájirıbede jıi kezdesedi.
— Bul — ekonomıkanyń zańy. LRT nemese metro bar jerde jyljymaıtyn múlik qymbattaıdy. Mysaly, Qytaıda bir kompanııa dalaǵa LRT salyp, keıin sonyń mańyndaǵy jer telimderin satyp, tabys taýyp otyr, — dedi ol.
Sonymen qatar ol jeńil relsti kóliktiń iske qosylýy Astananyń iskerlik jáne týrıstik tartymdylyǵyna da oń áser etetinin aıtty.
— LRT arqyly qalanyń ádemi kórinisi ashylady. Bul elordanyń ǵana emes, Qazaqstannyń da ımıdjine oń yqpal etedi. Qazaqstanda osyndaı jobanyń júzege asyp, iske qosylyp jatqanyna maqtana alamyz dep oılaımyn, — dedi Asylbek Dúısebaev.
Aıta keteıik, 12 mamyr kúni LRT vagondary jýrnalısterge tanystyryldy. Al jolaýshylar úshin jelini 16–17 mamyrda ashý josparlanyp otyr.
