LRT isi: memleketke 920 mln teńge aktıv qaıtaryldy
ASTANA. KAZINFORM — Elorda prokýratýrasy memleketke, ıaǵnı Astana qalasynyń ákimdigine qarasty «City Transportation Systems» JShS-niń (burynǵy ataýy «Astana LRT») paıdasyna qatysty sot aktileriniń oryndalý barysyna taldaý júrgizdi.
Aqparatta aıtylǵandaı, boryshkerler memleket balansyna jalpy sany 40 jyljymaıtyn múlikti qaıtardy. Onyń ishinde 39 turǵyn úı emes jaı jáne aýdany 12,8 ga temir joly bar asfalt-beton zaýytynyń jyljymaıtyn múlikke qyzmet kórsetý jer ýchaskesi.
— Qaıtarylǵan aktıvterdiń jalpy quny 920 mln teńge. Sonymen qatar memlekettiń paıdasyna quny 615 mln teńge turatyn taǵy 37 múlik nysan qaralyp jatyr, — delingen habarlamada.
Osy oraıda elorda prokýratýrasy bul baǵyttaǵy jumystyń jalǵasyp jatqanyn habarlap otyr.
Aıta ketsek, naýryzda Sybaılas jemqorlyqqa qarsy is-qımyl agenttigi LRT isine qatysty jaýaptylardy izdeýde ilgerileý baryn málimdegen edi.
2023 jyly elimizdiń Bas prokýratýrasy LRT isine qatysty jaýapty tulǵalar Talǵat Ardan men Qanat Sultanbekovti izdeý jumysyn toqtamaıtynyn habarlaǵan bolatyn.
Eske salaıyq, 2023 jyly mamyrda elordada salynbaı qalǵan Astana LRT qurylysyna qatysty qylmystyq is boıynsha sot úkimi shyqty. Sot úkimimen Talǵat Ardan men Qanat Sultanbekov 7 jylǵa sottaldy.
Bıyl naýryzda belgili bolǵandaı Interpol Talǵat Ardannyń qaıda ekenin áli anyqtamady.