LRT isi boıynsha Nuráli Álıev tergeý orbıtasyna tartyla ma
ASTANA. KAZINFORM – Bas prokýrordyń orynbasary Áset Shyndalıev Májilistiń jalpy otyrysynan keıin jýrnalısterdiń suraǵyna bergen jaýabynda LRT isi boıynsha Nuráli Álıev pen Darıǵa Nazarbaevanyń tergeý orbıtasyna tartylý múmkindigi týraly pikir bildirdi.
- LRT isi týraly jýrnalıstik zertteýlerde Nuráli Álıev pen Darıǵa Nazarbaevanyń esimi kóp atalady. Bul tulǵalar tergeý orbıtasyna tartyla ma, - dep surady jýrnalıst Májilistiń jalpy otyrysynan keıin.
Bas prokýrordyń orynbasary bul týraly ózge qylmystyq qýdalaý organdarynan málimet suraý kerektigin aıtty.
- LRT boıynsha tek qana aıtatynym – bizde eki is bar. Bireýi boıynsha 5 jyl buryn sot úkimi shyqqan.
Ekinshisi – osy T.Ardannyń isi. Túrkııada qamaqta otyrǵanyn jańa aıttym. Al siz aıtyp otyrǵan basqa adamdar týraly mende eshqandaı aqparat joq, men bilmeımin. Ol týraly basqa qylmystyq qýdalaý organdarynan suraý kerek, - dedi Áset Shyndalıev.
Eske salsaq, Ulttyq qaýipsizdik komıteti LRT salý jobasy arqyly memleketke 85,9 mlrd teńge shyǵyn keltirdi dep aıyptalǵan Talǵat Ardannyń Túrkııada ustalǵanyn málim etken bolatyn.