LRT qashan iske qosylady
ASTANA. KAZINFORM – LRT vagondarynyń alıýmınıı qorytpasynan jasalǵan korpýs elementterin daıyndaý jáne dánekerleý jumystary bastaldy. Bul týraly elordanyń «City Transportation Systems» JShS baspasóz qyzmeti habarlaıdy.

Alǵashqy jyljymaly vagondar mamyr aıynyń sońyna deıin daıyn bolady, qyrkúıekte alǵashqy poıyzdar jetkizilip, synaqtan ótkiziledi. Qytaıdyń Tanshan qalasynda elordada salynyp jatqan LRT alǵashqy jyljymaly quramdaryn qurastyrý jumystary júrgizilip jatyr.

– Testilik paıdalaný nemese testilik iske qosý – paıdalanýǵa berýdiń mańyzdy kezeńi. Bul kezeńde barlyq ınfraqurylym elementteri, jyljymaly quram jáne barlyq jabdyq tekseriledi, sonyń ishinde relsterdiń bútindigi, elektrmen jabdyqtaý júıesi, telekommýnıkatsııa júıeleri tolyq zertteledi. Synaqtar barysynda úlken kólemde derekter jınalyp, taldanady, onyń nátıjesi boıynsha LRT júıesin paıdalanýǵa berý týraly sheshim qabyldanady. Alǵashqy testilik iske qosý osy jyldyń qyrkúıek aıyna josparlanǵan, bul synaqtar birneshe aıǵa sozylady, - dep túsindirdi «City Transportation Systems» JShS basqarýshy dırektory Orynbasar Aǵybaev.
Jolaýshylar legin taldaý derekteri boıynsha LRT jyljymaly quramdary táýligine 25 myń jolaýshyny tasymaldaıdy dep josparlanǵan.

- Astana klımatynyń ereksheligin eskere kele, aldyńǵy terezesi temperatýrany retteıtin elektrli jylytý júıesimen jabdyqtalǵan. Bul kenetten bolatyn temperatýra ózgeristerinde áınektiń býlanýynyń aldyn alady. Kondıtsıoner qondyrǵysynyń qýaty 35 kVt (salqyndatý qýaty), - delingen habarlamada.
Avtomattandyrýdyń joǵary deńgeıi jáne syıymdylyǵy

Uzyndyǵy 60 metrlik jyljymaly quramdar GOA 4 deńgeıindegi avtomattandyrylǵan baǵdarlamalyq-apparattyq keshenmen jabdyqtalady, ol kelesi fýnktsııalardy qamtamasyz etedi:
• esikterdi avtomatty túrde ashý jáne jabý;
• toqtaý jáne jyldamdatý;
• depoǵa kirý jáne shyǵý;
• quramdardyń jaǵdaıyn baqylaý;
• poıyzdar arasyndaǵy qashyqtyqty retteý;
• operatordyń (mashınıs) qatysýynsyz basqa fýnktsııalardy oryndaý.
Tórt sektsııaly quramdar tolyq júktelgende (6 adam/sharshy metr) 600-den astam jolaýshyny syıdyra alady.
Jolaýshylardyń jaılylyǵy men qaýipsizdigi
• Salondarda beriktigi joǵary materıaldar, sonyń ishinde organosılıkatty bylǵary jáne shyny talshyqty kompozıt qoldanylady, bul jolaýshylarǵa jaılylyqty arttyrady.

Shýdy azaıtý úshin kelesi tehnologııalar qoldanylady:
• qalyńdatylǵan terezeler jáne shýdy báseńdetý elementteri;
• dıametri úlkeıtilgen dóńgelekter.
Quramdar zamanaýı aqparattandyrý júıelermen jabdyqtalady:
• syrtqy jáne ishki elektrondy tablolar;
• LCD-monıtorlar, olar qozǵalys baǵytyn, sońǵy jáne kelesi stantsııalardy, esikterdiń ashylý jaǵyn jáne shuǵyl aqparatty kórsetedi.
Tehnıkalyq sıpattamalary jáne jetkizý merzimi:
• Qýaty – 1 722 kVt;
• Eń joǵary jyldamdyq – 80 km/saǵ;
• Tolyq avtomattandyrý jáne operatorlardyń turaqty baqylaýymen júrgiziletin pılotsyz basqarý júıesi.

Aıta ketsek, jyl basynda elorda ákimi Jeńis Qasymbek LRT qurylysynyń aıaqtalýǵa jaqyn qalǵanyn aıtqan edi.