LRT qurylysyna daıyndyq: Almatyda burynǵy tramvaı relsteri alynyp jatyr
ALMATY. KAZINFORM — Almatynyń Tóle bı kóshesinde jol jumystary júrgizilip jatyr.
Almatylyqtar buryn tramvaı júrgen kósheniń ortasynda jumysshylar eski relsterdi alyp jatqanyn baıqaǵan. Onyń mán-jaıyn anyqtaý úshin Almaty ákimdigine júgindik.
Atalǵan jumystarǵa Almaty qalasynyń jol ınfraqurylymyn damytý basqarmasy túsinikteme berdi. Vedomstvo málimetinshe, qazir LRT jobasyn iske asyrý úshin daıyndyq kezeńi bastalǵan. Atap aıtqanda, Tóle bı kóshesiniń Saın kóshesinen Ótegen batyr kóshesine deıingi bóliginde eskirgen tramvaı relsteri bólshektelip jatyr. Jınalǵan materıaldardyń barlyǵy — «Almatyelektrotrans» JShS-yna ótkiziledi.
— Bul jumystar aıasynda Tóle bı kóshesiniń boıyndaǵy eski joldardy tolyqtaı alyp tastaý josparlanǵan. Bul shara jeńil relsti kólik jelisiniń qurylysyn jedeldetýge múmkindik beredi, — dep habarlady basqarmadan.
Eske salaıyq, buǵan deıin Almatyda LRT jobasynyń tehnıkalyq-ekonomıkalyq negizdemesi ázirlendi.
Qujat málimetteri boıynsha LRT deposy Farıza Ońǵarsynova, Móńke bı jáne Baýyrjan Momyshuly kósheleriniń aralyǵynda ornalasady. Depodan bastaý alǵan jyldam relsti kólik jelisi B.Momyshuly kóshesimen ońtústik baǵytta Tóle bı kóshesine deıin, sosyn Tóle bı kóshesimen shyǵys baǵytta Abylaı han dańǵylyna deıin júredi. Osy ýchaskeden marshrýt soltústikke qaraı burylyp, Abylaı han dańǵylymen Almaty-2 temirjol vokzalyna deıin jalǵasady. Sońǵy aıaldama «Raıymbek batyr» — kólik-aýysyp otyrý torabynyń aýmaǵynda qarastyrylǵan. 2027 jyldyń ІІ toqsanynda qurylys bastalyp, 2029 jyldyń ІІ toqsanynda qurylysy aıaqtalýy yqtımal.
Sondaı-aq Almatyda LRT jelisin salý úshin jer alý jumystary bastaldy. Barlyǵy memleket muqtajy úshin 4 aýdannyń 270 jer ýchaskesi alynady.