LRT qurylysyna alǵashqy rels tóseldi

ASTANA. KAZINFORM - LRT tájirıbelik bóliginde jarty shaqyrym rels tóseldi. Bul týraly CTS kompanııasy habarlady.

— № 116 jáne № 117 stantsııalar arasyndaǵy estakada bóliginde rels jolynyń alǵashqy 500 m tóseý aıaqtaldy. Bul synaq kezeńi qysqy aýa-raıynyń LRT joǵarǵy qurylymynyń jaı-kúıine áserin zertteýge múmkindik beredi. Rels joly armatýralyq jaqtaý, shpaldar, relster jáne bekitkishterden turady. Estakadanyń jalpy uzyndyǵy 22,4 km quraıdy jáne onyń búkil uzyndyǵyna qos jol salynady. Bul poıyzdardyń júrýin, olarǵa qyzmet kórsetýdiń jáne jóndeý jumystaryn oryndaýdyń yńǵaılylyǵyn qamtamasyz etedi — delingen kompanııa habarlamasynda.

Joldy tóseý zamanaýı tehnologııalardy qoldaný arqyly júzege asyrylady.

Kompannyń málimetine qaraǵanda standartty jol eni — 1 435 mm, halyqaralyq standarttarmen úılesimdilikti qamtamasyz etedi.

Sonymen qatar relsterdi jiksiz tóseý poıyz dóńgelekteriniń dybysy men dirildi azaıtady. Aldyn ala kernelgen shpaldar jarylyp ketýden qorǵalǵan, aıazǵa jáne qardyń erýine tózimdi

Jyly kezeńiniń bastalýymen estakadanyń barlyq uzyndyǵyna relsterdi tóseý bastalady.

Estakada rels joldaryn tóseýdi aıaqtaý 2025 jylǵa josparlanǵan.

Eske salsaq, LRT stantsııalaryndaǵy negizgi qurylys jumystary aıaqtalǵany týraly habarlandy.