LRT kólik júıesi avtobýs marshrýttarymen ıntegratsııalanady
ASTANA. KAZINFORM — Tarlan Astana jeńil relsti kólik júıesi avtobýs marshrýttarymen jáne kóliktik-logıstıkalyq toraptarmen ıntegratsııalanady. Bul týraly Úkimet otyrysynda elorda ákimi Jeńis Qasymbek aıtty.
— Qoǵamdyq kólikti damytý jalǵasyp jatyr. Qazirgi ýaqytta Bus Lane arnaıy avtobýs jolaqtary 146 shaqyrymdy qurap, byltyrǵy jylmen salystyrǵanda 6,6 paıyzǵa artty. Sońǵy birneshe jylda avtobýs parkterindegi jyljymaly quram sany 60 paıyzǵa 1 200 avtobýstan 1 900 avtobýsqa deıin artty. Tarlan Astana jeńil relsti kólik júıesi damýyna qaraı ony avtobýs marshrýttarymen jáne kóliktik-logıstıkalyq toraptarmen ıntegratsııalaý júzege asyrylatyn bolady, — dedi qala basshysy.
Onyń málimetinshe, 2030 jylǵa qaraı qoǵamdyq kólik paıdalanýshylarynyń úlesi 60 paıyzǵa deıin artady dep kútiledi.
— Budan basqa, jańa jol jobalaryn iske asyrý bastaldy. F.Ońǵarsynova kóshesinen Qabanbaı batyr dańǵylyna deıingi № 38-shi kósheniń qurylysy Máńgilik El, Qabanbaı batyr jáne Turan dańǵyldaryndaǵy kólik júktemesin tómendetýge múmkindik beredi. Qabanbaı batyr dańǵyly boıynda eki deńgeıli jol jobalanyp jatyr. Joba kólik qozǵalysyn toqtaýsyz qamtamasyz etip, sol jaǵalaýdaǵy negizgi magıstraldarǵa túsetin júktemeni azaıtady. Sonymen qatar, Hýseın ben Talal kóshesin ózen arqyly ótetin kópir qurylysymen jalǵastyrý josparlanǵan. Joba sol jaǵalaý men «Nurly jol» vokzaly aýdanyn baılanystyratyn qosymsha kólik qatynasyn qamtamasyz etedi, — dedi Jeńis Qasymbek.
Astanadan Qosshyǵa deıingi LRT jelisiniń qurylysy 2027 jyly aıaqtalmaq.
