LRT qashan iske qosylady: Nur-Sultan ákimdigi josparymen bólisti
NUR-SULTAN. QazAqparat – Elorda ákimdigi jeńil relsti kólik júıesiniń qurylysy men onyń qajettiligine qatysty boljamnyń mán-jaıyn jarııalady, dep habarlaıdy QazAqparat tilshisi.
«LRT jobasyn UA4 rejiminde (100 paıyz avtomatty basqarý) 2020 jyly iske qosý josparlanǵan. Búgingi tańda konsortsıýmmen birlesip jańa jumys kestesi jasalyp jatyr. Bas josparǵa sáıkes, LRT joly boıynda ornalasqan aýdandardaǵy halyq sany 2030 jylǵa qaraı 500 myńnan artady. Qazirgi ýaqytta áýejaı men jańa temirjol vokzalynyń arasyndaǵy jolaýshylar aǵyny kúnine 29 myń sapardy quraıdy», - dep habarlady ákimdiktiń baspasóz qyzmeti redaktsııanyń jazbasha suraýyna jaýap bere otyryp.
Osyǵan baılanysty qazirgi kezeńde jyljymaly quramnyń bir bóligin satyp almaı-aq, poıyzdardyń sanyn 19-dan 12-ge deıin qysqartý kózdelgeni atap ótildi. Sarapshylardyń boljamy boıynsha, bul shara shamamen 40 mıllıon AQSh dollaryn nemese 15 mıllıard teńgeni únemdeýge múmkindik beredi.
«Joba boıynsha bastapqy shyǵyndardy azaıtý úshin ákimdik iske qosý keshenderin bólý múmkindigin qarastyryp jatyr. Joba boıynsha áýejaıdan «Nurly jol» stantsııasyna deıingi ýchaskede 18 stantsııanyń qurylysy qarastyrylǵan», - dep eske saldy ákimdik.
Osylaısha, jolaýshylar aǵynynyń qazirgi júktemesin eskere otyryp, 7 stantsııanyń ashylýyn ekinshi iske qosý keshenine aýystyrý josparlanyp otyr. ıAǵnı, jerasty jaıaý júrginshiler ótkelderiniń bastapqy shyǵyndary proportsıonaldy túrde azaıady. Bul, jobanyń eksplýatatsııalyq jumysy men qaýipsizdikti buzbaı 110 mln AQSh dollaryn nemese 42 mlrd teńgeni únemdeıdi.
Eske salsaq, buǵan deıin Prezıdent Qasym-Jomart Toqaev LRT qurylysyn jedeldetýdi jáne oǵan qatysty isti tergeýdi tapsyrǵan bolatyn.
