LRT eki aptada 1 mıllıon jolaýshyny tasymaldady
ASTANA. KAZINFORM — LRT-ǵa kún saıyn shamamen 75 myńǵa deıin jolaýshy minedi. Bul týraly Astana qalasynyń ákimi Jeńis Qasymbek málimdedi.
Onyń sózinshe, LRT ashylǵan sátten bastap eki apta ishinde jolaýshylar aǵyny 1 mln adamǵa jetti. Kún saıyn jolaýshylar sany shamamen 65-75 myń adamdy quraıdy.
— Bul kórsetkish qalalyq relsti kóliktiń jańa túri elorda turǵyndary men qonaqtary arasynda suranysqa ıe ekenin kórsetedi. LRT-ny belsendi paıdalanyp, jańa kólik júıesine senim artqany ári ınfraqurylymǵa jaýapkershilikpen qaraǵany úshin jolaýshylarǵa alǵysymdy bildiremin, — dedi Jeńis Qasymbek.
Ákim atap ótkendeı, Qosshy baǵytyndaǵy LRT-nyń ekinshi kezeńi qolǵa alyndy.
— LRT-nyń Qosshy baǵyty boıynsha ekinshi kezeńin iske asyrý jumysy bastaldy. Jobanyń júzege asýy kólik ınfraqurylymyn odan ári damytýǵa múmkindik beredi, — dep jazdy shahar basshys Instagram-daǵy paraqshasynda.
Eske salsaq, 16 mamyrda Prezıdent Astana LRT jumysyn iske qosty.
LRT júıesiniń alǵashqy jolaýshysy retinde Prezıdentke 001 serııaly karta berildi.
18 mamyrdaǵy jaǵdaı boıynsha, LRT iske qosylǵannan beri jolaýshylar sany 180 myńǵa jetti.
Osyǵan deıin Jeńis Qasymbek LRT jobasy tolyq iske assa, uzyndyǵy 100 shaqyrymǵa jetetinin aıtty.
