LRT-da 37 ákimshilik quqyq buzýshylyq anyqtaldy – QR ІІM
ASTANA. KAZINFORM- «Tarlan Astana» jeńil relsti kólik nysandaryndaǵy qoǵamdyq tártip pen azamattardyń qaýipsizdigin Kóliktegi polıtsııa departamentiniń LRT nysandaryndaǵy polıtsııa bóliminiń qyzmetkerleri qamtamasyz etedi, dep habarlaıdy QR Іshki ister mınıstrliginiń baspasóz qyzmeti.
Jalpy uzyndyǵy 22 shaqyrymnan asatyn LRT jelisi elordanyń negizgi kólik toraptaryn baılanystyryp, temirjol vokzalynan áýejaıǵa deıingi baǵytty qamtıdy.
Astana stantsııasyndaǵy kóliktegi polıtsııa basqarmasy bastyǵynyń birinshi orynbasary Beslan Natsıevtiń aıtýynsha, LRT jelisindegi 18 stantsııanyń árqaısysynda kólik polıtseıleri aýysymmen kezekshilik atqarady. Sonymen qatar kún saıyn qosymsha polıtsııa jasaqtary poıyzdar qozǵalysy kezinde vagondardy tolyq aralap, tekserý jumystaryn júrgizedi.
Táýliktik kezekshilik quramyna ınspektor-kınologtar da kiredi. Olar qyzmettik-izdestirý ıtteriniń kómegimen vagondar men stantsııalardy tekseredi.
Onyń aıtýynsha, jeńil relsti kólik qyzmetin kún saıyn orta eseppen 70 myńǵa jýyq jolaýshy paıdalanady. Jolaýshylar aǵynynyń joǵary bolýyna baılanysty qoǵamdyq tártipti saqtaý, quqyq buzýshylyqtardyń aldyn alý jáne kólik ınfraqurylymy nysandarynda belgilengen tártip talaptarynyń oryndalýyn qamtamasyz etýge erekshe kóńil bólinedi. Sondaı-aq turǵyndar men jolaýshylar arasynda túsindirý jumystary turaqty júrgiziledi.
Bul baǵyttaǵy jumystarda zamanaýı tehnıkalyq quraldar da belsendi qoldanylady. Nysandar beınebaqylaý jáne dabyl júıelerimen, sondaı-aq shuǵyl baılanys baǵandarymen jabdyqtalǵan. Qazirgi ýaqytta ár vagonnyń ishinde segiz beınebaqylaý kamerasy ornatylǵan. Budan bólek, jyljymaly quramnyń syrtqy bóligine taǵy eki kamera ornalastyrylǵan.
– Osy kezeńde LRT nysandarynda úsh qylmys tirkelip, olardyń barlyǵy boıynsha sotqa deıingi tergep-tekserý júrgizildi. Sonymen qatar 37 ákimshilik quqyq buzýshylyq anyqtaldy. Jıi kezdesetin quqyq buzýshylyqtardyń qatarynda usaq buzaqylyq jáne qoǵamdyq oryndarǵa alkogoldik masań kúıde kelý faktileri bar. Mundaı áreketter qoǵamdyq tártipti buzyp qana qoımaı, jolaýshylardyń qaýipsizdigine de qaýip tóndiredi. Osyǵan baılanysty LRT nysandary qaýiptiligi joǵary obektiler qataryna jatatynyn eske salamyz. Munda mas kúıinde bolý adamnyń ózine de, aınalasyndaǵylarǵa da qaýip tóndirýi múmkin, – dedi Beslan Natsıev.
Jýyrda «Áýejaı» stantsııasynda polıtsııa qyzmetkerleri alkogoldik masań kúıde bolǵan azamatty anyqtap, ustady. Er adam qoǵamdyq orynda ózin ádepsiz ustap, aınalasyndaǵylardyń mazasyn alǵan. Quqyq buzýshy ákimshilik jaýapkershilikke tartyldy.
Kólik polıtsııasy qoǵamdyq tártipti qamtamasyz etýmen qatar, jolaýshylarǵa joǵalǵan nemese umytyp ketken zattaryn tabýǵa jáne ıelerine qaıtarýǵa da kómektesedi. Elordada LRT jelisi iske qosylǵannan beri 200-den astam joǵalǵan zat ıelerine qaıtarylǵan.
– Biz «City Transportation Systems» JShS jáne tıisti qyzmettermen birlesip, jolaýshylardyń qaýipsizdigin qamtamasyz etý, qoǵamdyq tártipti saqtaý jáne quqyq buzýshylyqtardyń aldyn alý baǵytyndaǵy jumysty jalǵastyramyz, – dep tolyqtyrdy Beslan Natsıev.
Osyǵan deıin elordada LRT-tynyń qosylýy áýejaı jolaýshylaryna qalaı áser etkeni týraly sholý jasadyq.
