LRT boıynsha synaq jumysy aıaqtalyp, júıe tolyqtaı paıdalanýǵa daıyn — Jeńis Qasymbek
ASTANA. KAZINFORM — Elorda ákimi Jeńis Qasymbek Astana LRT-nyń testilik qoldanylý barysymen, júıeniń negizgi jumys parametrlerimen jáne ınfraqurylymnyń daıyndyǵymen tanysty. Bul týraly ákim Facebook-tegi paraqshasynda jazdy.
Ákimniń sózinshe, qazirgi tańda LRT boıynsha synaq jumysy is júzinde aıaqtalǵan, júıe tolyqtaı paıdalanýǵa daıyn.
— LRT-ny jaqyn ýaqytta iske qosýdy josparlap otyrmyz. Qazir ınfraqurylym men abattandyrý jumysy belsendi júrip jatyr. LRT iske qosylǵanǵa deıin eń aldymen stantsııalarǵa kedergisiz qoljetimdilikti qamtamasyz etý jumysy tolyq aıaqtalatyn bolady. Abattandyrý jumysy jaz boıy belsendi túrde jalǵasady. Qazirgi ýaqytta jumysy qarqyndy júrgizilip jatqan negizgi tustardyń biri — Táýelsizdik dańǵylynan «Nurly jol» jańa temirjol vokzalyna deıingi aralyq, — dedi ol.
Jeńis Qasymbek jaz mezgiline arnalǵan jumys josparyna myna baǵyttar engizilgenin aıtty:
1. Jol qurylysy: stantsııalardy qalanyń kólik jelisine biriktirý úshin irgeles joldar men kirme joldardy jaılastyrý kózdelgen.
2. Kógaldandyrý: jasyl jelek (aǵashtar, butalar jáne kópjyldyq shópter) otyrǵyzý boıynsha aýqymdy jumys josparlanǵan. Bul LRT jelisi boıynda «jasyl dáliz» qalyptastyrýǵa múmkindik beredi.
3. Jaryqtandyrý: túngi ýaqytta qaýipsizdik pen estetıkalyq tartymdylyqty qamtamasyz etetin zamanaýı jaryqtandyrý júıelerin ornatý qarastyrylǵan.
4. Abattandyrý: estakada astynda shaǵyn sáýlet nysandaryn ornatý jáne qala turǵyndary úshin tartymdy aımaqtardy qalyptastyrý josparlanǵan.
Qala basshysy atap ótkendeı, osylaısha, stantsııalar men olarǵa aparatyn joldardyń fýnktsıonaldyq daıyndyǵy jaqyn ýaqytta qamtamasyz etiledi, al LRT baǵyty boıyndaǵy landshaftyq-sáýlettik kelbetti keshendi túrde qalyptastyrý jaz maýsymynyń sońyna deıin jalǵasady. Bul jumysty agrotehnıkalyq normalardy tolyqtaı saqtaı otyryp, sapaly oryndaýǵa múmkindik beredi.
— Sol sııaqty qazir Sh.Qaldaıaqov kóshesiniń Táýelsizdik dańǵylynan A62 kóshesine deıingi aralyǵynda qurylys jumysy júrgizilip jatyr. Nysannyń jalpy uzyndyǵy 4,6 km quraıdy. Joba aıasynda kóshe-jol ınfraqurylymyn keshendi damytý qarastyrylǵan: jaıaý júrginshiler joldary men velojoldar salý, avtoturaq oryndaryn abattandyrý, syrtqy jaryqtandyrý júıesin ornatý, sýarýǵa arnalǵan sý qubyryn tartý, sondaı-aq kógaldandyrý aımaqtaryn ázirleý. Birinshi kezekte stantsııalarǵa irgeles aýmaqtardy abattandyrý jáne olarǵa kedergisiz qoljetimdilikti qamtamasyz etý úshin kireberis joldardy jaılastyrý jumysy oryndalyp jatyr. Qazir Táýelsizdik dańǵyly jaǵynan asfalt-beton jabynyn tóseý jáne abattandyrý jumysy júrgizilip jatyr. Bıyl Sh.Qaldaıaqov kóshesiniń Táýelsizdik dańǵylynan «Nurly Jol» temirjol vokzalyna deıin ótpeli qozǵalysty qamtamasyz etý josparlanǵan. Bekitilgen kestege sáıkes qozǵalysty kezeń-kezeńimen ashý kózdelgen. Sondaı-aq joldy ári qaraı S. Shaımerdenov kóshesine (jobalyq ataýy — A-62) deıin uzartý josparlanyp otyr, — dep túıindedi Jeńis Qasymbek.
Osydan buryn 28 sáýirden bastap Astana qalasy oqýshylary men jeńildik sanattaryna arnalǵan LRT ataýly kólik kartasyn rásimdeýge onlaın ótinim berý qyzmeti iske qosylatynyn jazǵanbyz.
