LRT alǵashqy 29 qyzmetkeri oqytýdyń birinshi kezeńin aıaqtady
ASTANA. KAZINFORM — LRT-niń 29 qyzmetkeri 3 naýryzda Astanada bastalǵan alǵashqy oqytý modýlin sátti aıaqtady, dep habarlaıdy City Transportation Systems.
Birinshi kezeńde qatysýshylar teorııalyq bilim alyp, testileýden sátti ótti. Qazirgi ýaqytta olar ekinshi modýldi oqýǵa kiristi, odan keıin Qytaıǵa baryp, praktıkalyq sabaqtar men taǵylymdamadan ótedi.
— 2025 jylǵy 1 qyrkúıekke deıin eseptelgen oqytý baǵdarlamasy Astana qalasynda (Qazaqstan) jáne Tıantszın qalasynda (QHR) iske asyrylady. Onyń maqsaty — LRT júıelerin paıdalaný, tehnıkalyq qyzmet kórsetý jáne jóndeý boıynsha mamandar daıarlaý. Sabaqtardy Tıantszın metropolıteni men Chjenchjoý temirjol kásiptik-tehnıkalyq ýnıversıtetiniń sarapshylary júrgizedi, — delingen habarlamada.
2024 jylǵy qarashadan 2025 jylǵy qańtarǵa deıin baǵdarlamaǵa qatysýǵa 140 ótinim berildi, onyń ishinde 29 úmitker irikteldi. Olardyń qatarynda Astana qalasynyń 15 turǵyny, sondaı-aq Almaty, Taraz, Esil, Pavlodar, Kókshetaý, Arqalyq, Qaraǵandy, Ekibastuz, Qyzylorda jáne Abaı óńiriniń ókilderi bar. Bilim alýshylardyń ortasha jasy 33 jasty quraıdy.
Baǵdarlama qalalyq temirjol kóliginiń negizderin, onyń júıeleriniń negizgi komponentterin jáne tótenshe jaǵdaılar kezindegi áreket algorıtmderin oqyp-úırenýdi qamtıdy.
Oqytý LRT qurylysyn júzege asyrýǵa arnalǵan EPC kelisimsharty sheńberinde júrgiziledi jáne ony merdiger «China Railway Asia-Europe Construction Investment» kompanııasy júzege asyrady.
Osyǵan deıin Astana ákimi LRT qurylysynyń barysy týraly aıtty.