Lozannada Reseı quramasyn Olımpıadaǵa qatystyrý máselesi talqylanyp jatyr
ASTANA. QazAqparat - Lozanna qalasynda Rıo Olımpıadasyna Reseı qurama komandasynyń qatysý-qatyspaýyna qatysty talqylaý bastaldy, dep habarlady rbc.ru.
Halyqaralyq Olımpıada komıteti ǵımaratynda ótip jatqan jıynǵa Reseı Olımpıada komıtetiniń prezıdenti Aleksandr Jýkov qatysyp otyr. Bul týraly «Rossııa-24» telearnasynyń tilshisi habarlady.
Sonymen qatar, jıynǵa HOK-tyń qurmetti prezıdenti Jan-Klod Kılı kelgen.
Eske sala keteıik, Reseı quramasy Rıo-de-Janeıroda ótetin jazǵy oıyndardan ǵana emes, 2018 jylǵy qysqy Olımpıadadan da shettetilýi múmkin ekenin sheteldik BAQ ókilderi jarysa jazyp jatyr. Bıyl Reseıden Rıo olımpıadasyna 387 sportshy joldama jeńip alǵany belgili. Qazirgi derek kózderine senetin bolsaq, Reseı quramasy barlyq sport túrinen Olımpıada-2016 oıyndaryna qatyspaýy múmkin. Oǵan basty sebep - dopıng daýy.
Búgin brıtanııalyq tanymal Daily Mail basylymy Halyqaralyq olımpıada komıteti (HOK) búkil Reseı quramasyn «memlekettik dopıngtik baǵdarlamasy» úshin jazalap otyrǵanyn, al HOK-tyń ustanymy «dopıng - sport ataýlyǵa jasalǵan shabýyl» ekenin alǵa tarta otyryp, reseılik sportshylardy Olımpıada oıyndarynan shettetetini týraly jazady. Sondaı-aq, keıbir derekkózder keltirgen dáıekterge súıensek, Reseı sportshylaryn tek Rıodan ǵana emes, 2018 jyly Ońtústik Koreıada ótetin qysqy olımpıada oıyndarynan da shettetý máselesi qarastyrylyp jatqany aıtylady.
Osyǵan deıingi derekterde habarlanǵandaı, Halyqaralyq olımpıada komıteti reseılik sportshylardyń Rıo olımpıadasyna qatysý-qatyspaýy týraly sheshimin shildeniń 24 kúni jarııalaýy tıis bolatyn. Búgin bul máselege núkte qoıylýy tıis.
Esterińizge sala keteıik, dopıng daýy Qazaqstan quramasyn da aınalyp ótken joq. Osyǵan deıin halyqaralyq aýyr atletıka federatsııasy (IWF) qazaqstandyq aýyr atlet Ilıa Ilınniń Beıjiń men London Olımpıadalary kezinde, al Zúlfııa Chınshanlo, Maıa Maneza jáne Svetlana Podobedova úsheýi sońǵy Olımpıadada dopıng qoldandy dep, jarystardan shettetken bolatyn. Bul aty atalǵan sportshylar bıylǵy Rıo olımpıadasyna qatyspaıdy.
