Louis Vuitton kıiz úı stılindegi sómke shyǵarýy múmkin
ASTANA. KAZINFORM — Qazaqstandyq startaperdiń jobasyna áıgili frantsýz brendi Louis Vuitton qyzyǵýshylyq tanytty.
Bul týraly Aınur Bolattyń ózi Jibek Joly arnasynyń «Búgin LIVE» baǵdarlamasynda aıtyp berdi.
— Osydan úsh jyl buryn «Qazaqta ústel formatyna keletin oıyn bar ma?» degen suraq týyndady. Іzdene kele, oıyndarymyzdyń kóbi jelip júrip, shaýyp júrip oılanatynyn túsindim. Biraq toǵyzqumalaqtyń baryn eskerip, taǵy da izdene bastadyq. Kitaphanalarda birneshe aı boıy izdendim, etnograftarmen kezdestim. Sol arqyly «bestemshe» syndy oıyndardy jańǵyrttyq. Oǵan qosa «bestas», «qumar» sekildi 5-6 oıyndy biriktirip, «Talapaı» jobasyn qalyptastyrdym, — deıdi Aınur Bolat.
Kásipkerdiń aıtýynsha, jobanyń ataýy da erekshe maǵynaǵa ıe.
— «Talapaı» degen sóz bir nárseni talan-tartysqa salý, bólip alý degen maǵynany bildiredi. Men tapqan qazaqtyń umyt qalǵan oıyndaryn halqym talasyp, tarmasyp alsa degen nıetpen osy ataýdy qoıdym, — deıdi startaper.
Aınur Bolat ulttyq oıyndardy zaman talabyna saı tartymdy etýge de nazar aýdarǵan.
— Biz mektepte kórip ósken toǵyzqumalaqtyń syrty kók, kaýchýkten jasalatyn, asa tartymdy emes. Sol úshin ony aǵashtan jasap, barynsha sapaly, ádemi ári qundy qylyp kórsetkimiz keldi. Ekinshi jaǵynan, qazaq tili men orys tili jarysa qoldanylatyn zamanda qazaq tiliniń tanymyna, salt-dástúrge degen qyzyǵýshylyqty oıyndar arqyly meńgerse eken dedik. Úshinshi jaǵynan, oıyndardyń árqaısysy strategııalyq oılaý, logıka, shapshańdyq, ushqyrlyq syndy qabiletterdi damytady. Árbir oıynnyń ishki-syrtqy mazmunyna úńilsek, ony saǵattap sıpattaýǵa bolady, — deıdi ol.
Joba alǵashynda úlken qoldaý tappaǵanymen, ýaqyt óte kele kásipker ony halyqaralyq deńgeıge shyǵarýdy qolǵa alǵan.
— Joba alǵash bastalǵanda asa qatty qoldaý taba qoıǵan joq. Biraq ýaqyt óte kele «nege bıikten kórmese?!» degen oı týyndady. Sol sátte Shveıtsarııadaǵy Louis Vuitton-nyń kıiz úı nusqadaǵy dúkenderi ashylǵan edi. Ózderińiz biletindeı, Louis Vuitton birneshe jyldan beri shahmatpen jaqsy kollaboratsııa jasaıdy. Meniń de oıynym shahmattan kem emes, ol da adamnyń strategııalyq qabiletin damytady. Sonyń bárin biriktirip, «nege kıiz úı úlgisinde sómke jasamasqa?!» degen suraq týdy, — deıdi Aınur Bolat.
Kásipkerdiń aıtýynsha, dál osy ıdeıamen ol eki jyl buryn Louis Vuitton kompanııasyna resmı hat joldaǵan.
— Eki aptadan keıin maǵan hat keldi. Biraq, shynyn aıtsam, hatyma jaýap keledi dep oılamadym. Sol úshin alǵashynda elemeı júrdim. Óıtkeni mundaı brendke olardyń asa qatty qyzyǵýshylyǵy bola qoımas dep oılaǵan edim. Odan keıin kelgen birneshe hattardy oqyp, shynymen de meniń atyma kelgenine kóz jetkizip, ary qaraı birge jumys isteýdi bastadyq, — deıdi startaper.
Louis Vuitton kompanııasynan kelgen hatta:
- Qurmetti Polatova Aınur! Bizge sizdiń ıdeıańyz unady. Ary qaraı talqylaý úshin osy nómirge habarlasyńyz, — dep jazylǵan.
— Biz alǵashqy kezdesýdi onlaın ótkizdik. Keıin Parıj qalasyna bardym. Jalpy birneshe ret kezdestik. Kelisim áli tolyq aıaqtalǵan joq. Sebebi, ol uzaq ýaqytqa sozylatyn protsess. Bári birden bola qoımaıdy. Qazir qajetti jumystar atqarylyp jatyr. Nátıjesinde kıiz úı beınesindegi sómke shyǵýy qajet, — deıdi Aınur Bolat.
Aıta keteıik, Ortalyq Azııadaǵy eń iri startap baıqaýy — Astana Hub Battle óz máresine jetti. Baıqaý tarıhynda alǵash ret birden alty joba jeńimpaz atandy jáne ár komanda 25 myń AQSh dollary kóleminde grant alady.