Loý Tsıntszıan: Qytaı men EO arasynda geosaıası qaıshylyq joq
ASTANA. KAZINFORM — Búkilqytaılyq halyq ókilderi jınalysynyń (BHÓJ) baspasóz hatshysy Loý Tsıntszıan Qytaı men Eýropalyq Odaq (EO) arasynda túbegeıli múdde qaqtyǵysy da, bitispes geosaıası qaıshylyq ta joq ekenin málimdedi, dep habarlaıdy Kazinform tilshisi BHÓJ kezekti sessııasynyń baspasóz ortalyǵyna silteme jasap.
XIV shaqyrylymdaǵy BHÓJ-diń úshinshi sessııasy 4 naýryz kúni Beıjińdegi Halyq saraıynda baspasóz máslıhatyn ótkizdi.
Ispandyq jýrnalıstiń Qytaı men EO qarym-qatynasy týraly saýalyna jaýap bergende Loý Tsıntszıan Qytaıdyń bul máselege tótenshe mán beretinin atap ótti. Onyń aıtýynsha, álemdik arenadaǵy beıbitsúıgish ári konstrýktıvti kúshter retinde, Qytaı men EO arasyndaǵy qarym-qatynastyń turaqty damýy qos taraptyń túbegeıli jáne uzaq merzimdi múddesine, halyqaralyq qaýymdastyqtyń ortaq tilegine saı keledi.
Ol Qytaı men EO arasyndaǵy saýda-ekonomıkalyq baılanystardyń jalpy alǵanda turaqty damyp kele jatqanyn qadap aıtty. Ózara saýda-ekonomıkalyq yntymaqtastyq taraptardyń ekonomıkalyq damýyn yntalandyryp qana qoımaı, jahandyq óndirý-jetkizý tizbekteriniń turaqtylyǵyna jáne álemdik ekonomıkanyń ósimine oń áser etip keledi. Qazirgi tańda Qytaı men EO kóptegen salada birin-biri tolyqtyratyn jáne ózara tıimdi yntymaqtastyq ornatyp otyr.
Loý Tsıntszıan 2025 jyly Qytaı men EO arasyndaǵy dıplomatııalyq qatynastyń 50 jyldyǵy atap ótiletinin eske saldy.
— Ótken jarty ǵasyrdaǵy tájirıbe kórsetkendeı, Qytaı men EO arasynda túbegeıli múdde qaqtyǵysy da, bitispes geosaıası qaıshylyq ta joq, biz bir-birimizge súıeý bolarlyq seriktestermiz, — dedi ol.
Sondaı-aq, ol Qytaı men EO qarym-qatynasynyń úshinshi tarapqa baǵyttalmaıtynyn, táýeldi nemese kiriptar bolmaıtynyn erekshe atap ótti. Onyń aıtýynsha, Qytaı men EO arasyndaǵy yntymaqtastyqty damytý úshin eń aldymen ózara senim kerek. Taraptar barlyq qıyndyqqa moıymaı, strategııalyq turaqtylyqty saqtaýy qajet.
— Qytaı tarapy EO-men joǵary deńgeıdegi kelisimderdi birlesip júzege asyrýǵa, jahandyq syn-qaterlerdi tize qosa eńserýge, birjaqtylyq pen protektsıonızmge jumyla qarsy turýǵa daıyn. Qytaı EO-men qarym-qatynasty jaqsartýǵa jáne alǵa qaraı damytýǵa nıetti, — dedi ol.
Buǵan deıin habarlanǵandaı, Qytaı AQSh-tyń jańa baj salyqtaryna baılanysty DSU-ǵa shaǵym túsirdi.