«LOTUS FEST-2026» festıvaliniń ashylý saltanatyna 3 myńǵa jýyq adam qatysty
ATYRAÝ. KAZINFORM — Qurmanǵazy aýdanyna qarasty Teńiz aýylynda «LOTUS FEST-2026» mádenı-týrıstik festıvaliniń saltanatty ashylý rásimi ótti.
Festıvaldiń resmı bóliminde Qurmanǵazy aýdanynyń ákimi Abat Janǵalıev qatysyp, turǵyndar men qonaqtardy aıtýly sharanyń ashylýymen quttyqtady.
— Búgingi «LOTUS FEST-2026» festıvaliniń ashylýymen quttyqtaımyn. Bul is-shara — lotos alqabynyń tabıǵı sulýlyǵyn kópshilikke tanytyp qana qoımaı, óńirdiń týrıstik áleýetin arttyrýǵa múmkindik beredi. Ásirese, osyndaı erekshe tabıǵı nysandardy týrıstik baǵytqa aınaldyryp, Atyraýǵa keletin qonaqtar sanyn kóbeıtýge jol ashady, — dedi aýdan ákimi.
Merekelik shara kontserttik baǵdarlamamen jalǵasty. Kórermender aldynda «Sarmad» etno-folklorlyq ansambli, «Jaıyq qyzy» halyqtyq bı ansambli óner kórsetip, estrada juldyzy Qýandyq Rahym án shyrqady.
Festıval lotos alqabynyń tabıǵı ereksheligin tanytyp, óńirdiń mádenı jáne týrıstik áleýetin keńinen nasıhattaýǵa baǵyttaldy.
