Lotte Qazaqstanda eki qonaqúı salmaq
ASTANA. KAZINFORM — Memleket basshysy Lotte Group kompanııasynyń basqarma tóraǵasy Don Bın Shındi qabyldady.
Aqordanyń habarlaýynsha, Qasym-Jomart Toqaev Lotte kompanııasy eki eldiń ekonomıkalyq yqpaldastyǵyn nyǵaıtýǵa eleýli úles qosqan senimdi seriktes ekenin atap ótti.
Prezıdent koreıalyq kompanııanyń elimizdiń tamaq ónerkásibindegi qyzmetin joǵary baǵalap, «Rahat» brendin ilgeriletýge, sondaı-aq Almaty jáne Shymkent qalalaryndaǵy óndiristik alańdardy jańǵyrtýǵa qatysty tabysty jobalaryna nazar aýdardy.
Budan bólek, Memleket basshysy kólik-logıstıka ınfraqurylymyn jandandyryp, óńirlik jáne halyqaralyq naryqtarǵa shyǵý múmkindigin arttyrý jónindegi Lotte Global Logistics josparyna toqtaldy.
Kezdesý barysynda qonaq úı bıznesin damytý máselesi qarastyryldy. Memleket basshysy Almatyda Lotte brendimen salynatyn alǵashqy qonaq úı qurylysyna qatysty kelisimdi quptap, kompanııanyń Qazaqstandaǵy qyzmet aıasyn keńeıtý turǵysynan bul bastamanyń keleshegi zor ekenin aıtty.
Don Bın Shın kompanııanyń tamaq ónerkásibi, logıstıka qyzmeti jáne qonaq úı bıznesi salalaryna ınvestıtsııa quıý josparyn rastady. Sonymen qatar ol Alatau City jobasyn damytýǵa, sonyń ishinde Iconic Complex kesheniniń qurylysyna qatysýǵa nıetti ekenin jetkizdi.
Kezdesý sońynda Hotel Lotte Co. Ltd jáne Sensata Invest kompanııalary Almaty men Alataý qalalarynda Lotte otelderin salý boıynsha ózara túsinistik týraly memorandým almasty.
Eske salaıyq, buǵan deıin Prezıdent Qasym-Jomart Toqaev Hanwha Group vıtse-tóraǵasy Kım Don Vondy qabyldaǵanyn habarlaǵanbyz.
